Ilang beses sumugal si Christian Bables, 29, bago nakamit ang pangarap na mag-artista.
Sa eksklusibong panayam ng PEP.ph (Philippine Entertainment Portal), ikinuwento ng aktor na sinubukan niyang sumali ng ABS-CBN reality show na Pinoy Big Brother Teen Edition noong 2006.
Naranasan niyang pumila nang paikot-ikot sa labas ng ABS-CBN compound sa Quezon City.
Balik-tanaw ni Christian: "From Cavite ako, nagdyi-jeep, nagta-tricycle. E, kulang na lang sakyan ko walis para magpunta ako ng audition.
"To cut the long story short, when I auditioned for PBB, batch nina Kim Chiu yun.
"Nandun ako from 3 a.m. Pagdating ko dun, andami nang tao.
"Imagine yung buong ABS-CBN compound, palibot yun, tapos babalik ka ulit palibot, babalik ka ulit palibot. Ganun kahaba yung pila."
Pero hindi man lang daw siya nakatungtong sa audition.
"Hanggang sa 3 p.m. na nung ako na—totoo ito—nung ako na yung sasalang para mag-audition, nag-cut off yung audition.
"So, not for me."
EXTRA ON MMK
Nakuha naman siyang extra sa drama anthology ng ABS-CBN na Maalaala Mo Kaya.
Doon ay umasa siyang ma-discover ng noo'y ABS-CBN President at CEO at Maalaala Mo Kaya host na si Charo Santos-Concio.
"First TV exposure ko, MMK, extra ako. And then, yung bida, kinukunan siya, ta's ako nasa background.
"Meron akong thinking nun, magpapapansin ako sa camera kahit hindi sa akin yung focus.
"Kasi nasa isip ko nun, 'Sana mapansin ako ni Ma'am Charo.' Ganun nasa isip ko.
"So, kahit na mukha na akong ewan sa likod, talagang nagpo-project ako. Hahaha.
"Umaarte ako sa likod kahit wala ako sa script tsaka wala ako sa eksena. Ganun."
Pero hindi umubra ang pagpapapansin ni Christian noon.
BREAKOUT ROLE ON TV
Hanggang sa noong 2015, kinuha siyang extra para sa Kapamilya afternoon series na Nasaan Ka Nang Kailangan Kita.
Lahad ni Christian: "May trabaho ako nun sa isang telco. Okay naman work ko dun.
"Pero meron nag-offer. Three days lang yun. Nagpaalam ako sa boss ko, meron kaming project na ginagawa nun na sobrang laki. Hindi ko puwede iwan.
"Nagpaalam ako, 'Puwede po ba three days lang?' Sinabihan niya ako na, 'Pag nawala ka ng three days, di ka na makakabalik.'
"So, kinailangan ko manimbang."
Pinili ni Christian na mag-resign sa kanyang trabaho.
Laking pasasalamat niya na mula sa three days na taping para sa show ay ginawa siyang permanenteng supporting cast member.
"Nagdasal ako nang nagdasal, 'God, bahala ka na. Tatalon na ako sa bangin. Kung ano yung will Mo for me, Ikaw na bahala. Pero sa puso ko, gusto ko talaga ito dahil gusto ko talaga umarte.'
"Ang galing! God moves in mysterious ways.
"Yung three days na yun, na-extend nang na-extend hanggang sa napasama ako hanggang ending."
Gumanap siyang kaibigan ni Jane Oineza na siyang bida sa teleserye.
Noon pa lang ay napansin na ang talento ni Christian sa pag-arte kahit baguhan pa lang siyang artista.
Napapangiting sabi niya sa PEP.ph (Philippine Entertainment Portal), "Doon nagsimula. Dun ako nakuha for I Love You To Death, and then Die Beautiful, and then the rest is history."
Ang I Love You To Death ay 2016 romantic-comedy movie na pinagbidahan nina Enchong Dee at Kiray Celis.
Gumanap naman si Christian na best friend ni Paolo Ballesteros sa Die Beautiful noon ding 2016.
Si Christian ay nanalong best actor para sa 2021 Metro Manila Film Festival entry na Big Night, kunsaan gumanap siyang gay na nasa drug watchlist.