Pumanaw ang beteranong broadcaster at dating press secretary na si Ricardo “Dong” Puno, Jr. ngayong araw ng Martes, Pebrero 15, 2022.
Kinumpirma ng kanyang pamilya ang pagpanaw ni Puno bandang 12:15 kaninang tanghali dahil sa isang karamdaman.
Siya ay 76 taong gulang.
Si Dong ay nagsilbing host sa ilang dekalibreng public affairs programs sa GMA-7, ABS-CBN, at TV5.
Nagsimula ang kanyang TV career sa bakuran ng GMA-7, kung saan siya ang host ng Viewpoint (1984-1994) at Business Today (1990-1994).
Kabilang naman sa mga programa niya sa ABS-CBN ang Dong Puno Live (1995-2005), Dong Puno Tonight (2003), at Insider (2005-2006).
Nanungkulan din siyang senior vice president ng ABS-CBN News and Current Affairs.
Naging bahagi rin siya ng TV5 at Aksyon TV kung saan napanood siya sa mga programang Kalibre 41 (2011), News5 Debates: Hamon Sa Pagbabago (2011-2013), at Dong Puno De Kalibre (2011-2013).
Pansamantalang nilisan ni Dong ang mundo ng telebisyon nang itinalaga siya ni dating Pangulong Joseph Estrada bilang press secretary taong 2000.
Taong 2001, tumakbo siyang senador ngunit hindi siya pinalad manalo.
Bumalik siya ng ABS-CBN ngunit hindi rin siya nagtagal.
Noong 2007, tumakbo siya bilang kongresista sa lone district ng Muntinlupa ngunit natalo siya ni Ruffy Biazon.
Kabilang sa parangal na kanyang natanggap bilang public affairs host ay ang TOYM Award (1985), Best Male Host for Magazine Show ng KBP Golden Dove award (1999), at Ka Doroy Achievement Award (1993).
Samantala, nagpaabot naman ng pakikiramay ang dating kasamahan ni Dong sa broadcast industry na si Rico Hizon ng CNN Philippines.
Ayon kay Hizon, wala siya sa industriya ng pagbabalita kung hindi dahil kay Puno. Nagkasama noon ang dalawa sa GMA-7.
Buong mensahe ni Hizon: “Atty Ricardo “Dong” Puno—mentor, boss, friend, colleague and co-host my heart bleeds that you are no longer with us. I wouldn’t be in broadcast news without you.
"Thank you for believing in me. You will forever have a special place in my heart. Rest well Atty Dong, you will be missed. My deepest sympathies to Tita Christy and the family.”