Bigo ang kumpanya ni Paolo Bediones na makuha ang PHP654 million-peso deal sa Department of Education (DepEd).
Kaugnay ito ng pagnanais ng production company ni Paolo na Ei2 Tech na magpatuloy sa pagprodyus ng lessons na ipinapalabas sa DepEd TV.
Nakakuha ang PEP.ph (Philippine Entertainment Portal) ng kopya ng disqualification notice na ipinadala ng DepEd kay Paolo ng Ei2 Tech at sa kasosyo niyang si Cherie Cuela ng Radenta Technologies Inc.
Pirmado ito ni DepEd Undersecretary Alain Pascua, at may petsang February 10, 2022.
Nadiskwalipika sa bidding ang kumpanya nina Paolo at Cuela dahil hindi pasado ang nakuha nitong score na 64 percent para sa "technical component" ng evaluation ng DepEd. Ang passing score ay 70 percent.
Nakaapekto rin ang diumano'y falsification of documents na inireklamo ng higit isandaang (100) contractual production workers ng Ei2 Tech laban kay Paolo.
Ang grupo ng contractual workers na ito ang siya ring naglabas ng hinaing tungkol sa diumano'y delay sa pasuweldo ng Ei2 Tech matapos nilang maiprodyus ang kinakailangang lessons ng DepEd TV.
CONTRACT WORKERS' COMPLAINT AGAINST PAOLO
Diumano, umabot ng PHP42M ang unpaid salary nila pati na rin iba pang production workers na nagtrabaho sa Phase 1 ng DepEd TV project.
Base ito sa panayam ng PEP.ph kay Andres Bonifacio, isa sa 42 executive producers na dating nagtrabaho sa Ei2 Tech.
Read: Paolo Bediones owes 200 DepEd TV workers "P42M" unpaid talent fee, claims executive producer
Lumipas umano ang "one to eight months" na delayed at kulang-kulang ang pasuweldo sa kanila ni Paolo.
Kaya raw noong October 2022, nagpasya ang grupo ni Andres na tumigil sa trabaho hangga't hindi nababayaran ni Paolo ang mga suweldo nila.
Ilang beses daw nilang ipinarating ang kanilang hinaing kay Paolo, at ilang beses daw nangako si Paolo na babayaran sila, pero hindi raw ito tumutupad sa usapan.
Bukod pa rito, napag-alaman ng grupo ni Andres ang diumano'y "pandaraya" ni Paolo sa panibagong bidding para sa "Phase 2" ng DepEd TV project. Ito iyong PHP654-M deal.
Ani Andres, naalarma ang kanilang grupo nang mapag-alaman nilang ginamit umano ng kumpanya ni Paolo ang curriculum vitae (CV) ng Ei2Tech contractual workers para sa supporting documents na isinumite sa bidding ng DepEd.
Wala raw iyong pahintulot ng grupo ni Andres dahil as of October 2021 ay tumigil na nga sila sa trabaho.
Nakarating din sa grupo ni Andres na pineke umano ang signatures nila sa mga dokumentong ipinasa sa DepEd ng kumpanya ni Paolo.
Ayon pa rin kay Andres, ipinaabot ng kanyang grupo sa DepEd na nais nilang ipatanggal ang kanilang CVs sa mga dokumentong ipinasa ng Ei2 Tech dahil wala silang consent na gamitin ang mga ito.
Sa hiwalay na ulat ng PEP.ph noong January 27, sinabi ni Paolo na aminado siyang may delay sa pasuweldo niya sa contractual workers ng Ei2 Tech.
Depensa niya, may nag-back out na investor sa Ei2 Tech, pero sinisikap daw ng kumpanya na maghanap ng "additional funding" para mabayaran ang obligasyon nito.
Ayon kay Paolo, wala siyang nilokong mga tao at hindi siya nakinabang ng pinansiyal mula sa proyekto.
Read: Paolo Bediones airs side on delayed compensation of DepEd TV workers
DEPED ON WITHDRAWAL OF CONTRACTUAL WORKERS
Kinonsider ng DepEd ang reklamo ng contractual production workers laban sa kumpanya ni Paolo.
Ayon kay DepEd Undersecretary Pascua, hindi nag-comply ang Ei2 Tech sa hinihinging qualification of personnel para manalo ito sa bidding.
Si Pascua ay siya ring chairperson ng Bid and Awards Committee ng DepEd.
Inamin ng Ei2 Tech at Radenta Technologies Inc., sa liham nito noong February 3, na nag-withdraw ang experts o contractual workers na inaasahang magprodyus ng lessons.
Pero paliwanag ni Pascua, walang justifiable reason na naibigay ang dalawang kumpanya kung bakit nag-withdraw sa proyekto ang mga tauhan ng Ei2 Tech.
"The Bidder failed to justify the 'withdrawal of the key personnel of Ei2 Tech, Inc.'s production team.'
"Neither has the Bidder answered or responded to the allegations of falsification by the team members and use of the latter's names without their knowledge, as well as their discontinued engagement with Ei2 Tech, Inc., as early as October 2021," saad ni Pascua.
Isa raw sa basehan ng bidding ay ang inaasahang "experts" na magpoprodyus ng lessons na ipapalabas sa DepEd TV.
Sinabi niya na alinsunod ito sa Instruction to Bidders (ITB) o mga regulasyon para sa bidding para sa procurement of goods ng gobyerno.
Quote ni Pascua mula sa ITB: "Before contract negotiations, the Procuring Entity shall require assurances that the experts shall be actually available.
"The Procuring Entity shall not consider substitutions during contract negotiations except for justifiable reason as may be determined by the Procuring Entity, such as illness, death, or resignation, unless both parties agree that undue delay in the selection process makes such substitution unavoidable or that such changes are critical to meet the objectives of the Project.
"If this is not the case and if it is established that key staff were offered in the bid without confirming their availability, the Consultant may be disqualified."
Ganoon din daw ang nakasaad sa mismong batas para sa bidding transactions ng gobyerno.
Sa huli, ito ang desisyon ng DepEd ayon kay Pascua:
"Based on the foregoing discussion, BAC I has declared your bid for the Project as post-disqualified.
"We look forward to your participation in our other future procurement activities," dagdag ni Pascua.
Nananatiling bukas ang PEP.ph sa anumang pahayag ng mga personalidad na nabanggit sa artikulong ito.