Hindi ipinagdamot ni Glaiza de Castro ang bagong yugto ng kanyang buhay bilang Mrs. David Rainey.
Ka-date ni Glaiza ang mister niyang si David sa Film Ambassadors' Night ng Film Development Council of the Philippines (FDCP) na ginanap sa Metropolitan Theater, Linggo ng gabi, February 27, 2022.
Kinumusta ng PEP.ph (Philippine Entertainment Portal) sa Kapuso actress ang buhay may-asawa nito.
"Masaya. Finally, nandiyan na siya. Alam mo yung totoo na, totoo na, na magkasama na kami forever," nakangiting saad ni Glaiza.
"Medyo surreal pa rin pag ipinapakilala ko siya na asawa ko siya, ganyan, pero ang sarap ng pakiramdam na heto na talaga.
"He's here, and we're working to be married, just celebrating."
October 2021 ikinasal sina Glaiza at David sa Ireland, at isinapubliko nila ito noong February 13, 2022.
Sa vlog ni Glaiza, makikitang ikinasal sila sa tuktok ng bundok, at dumalo sa okasyon ang pamilya ni David at ilang malalapit nilang kaibigan.
Bakit hindi nila kaagad isinapubliko ang tungkol dito?
Paliwanag ni Glaiza: "Unang-una, hindi kasi nakapunta ang family ko. It was a decision during the pandemic kasi hindi nga namin alam kung kailan kami magkikita uli.
"So, parang we wanna make sure na rin na magbago man ang restrictions, madali na para sa akin and for him na magkita uli.
"Ang hirap, e, ilang years din kami na long-distance relationship. Siyempre ang hirap with the restrictions, hindi namin alam kung kailan kami magkikita ulit.
"But when we got married, ayun, in-announce namin after few months because we wanted to celebrate it with the family.
"Siyempre, gusto kong magkaroon ng time sa kanila. And nung ready na kami pareho, ayun, celebrate na with the world."
Nagbigay rin ng detalye ang Kapuso actress sa intimate Celtic wedding nila ni David sa Ireland.
"Sa United Kingdom, sa Northern Ireland, sa place niya. We had an Irish wedding because why not?
"Cold, gray, and rainy like his last name. Pero sabi nga nila, it's not an Irish wedding if it's not raining.
"During our wedding, ayun, Irish blessing. Umuulan, malamig.
"So, kung makikita ninyo sa vlog ko, dun sa video towards the end of the ceremony, I had my jacket also. Di ko na kinaya."
ON PLANNING A WEDDING IN THE PHILIPPINES
Ayon kay Glaiza, mahirap na wala ang pamilya niya sa kanyang kasal kaya pinaplano nila ni David na magpakasal din dito sa Pilipinas sa 2023.
"It was a hard decision kasi siyempre mahirap dalhin ang buong pamilya ko dun. Ilan kami, parang 20-plus kami buong pamilya.
"Para sa amin, if we can have two weddings, why not, di ba? A Filipino wedding and an Irish wedding. You know we can have the best of both worlds.
"Pinaghandaan talaga namin, nagpaalam ako, nagpaalam naman siya.
"We actually had a meeting with both families. We discussed it with them. That's actually the reason why I went there last September."
Nang tanungin ng PEP.ph kung saan nila balak mag-honeymoon, nagbiro si Glaiza na nauna na ang honeymoon bago ang kasal.
"Actually, parang nauna nga, e. We did it backward, we met in Spain. So that's sort of our honeymoon," direktang pahayag ni Glaiza.
"Pero siyempre mayroon pa rin after our wedding here.
"We have to meet in Spain because of the quarantine. Yung vaccination card ko rin was an issue. Kasi, if I go straight to United Kingdom, hindi accepted ang Sinovac.
"Medyo struggle din yun, figuring out kung paano.
"Thankfully, Spain is accepting Sinovac. It's one of the few countries na nire-recognize yung vaccine."
ON BABY PLANS
Hindi nagmamadali si Glaiza na magka-baby agad sila ni David.
"Matagal pa. Gusto ko pang mag-travel, gusto ko pa i-spend yung time namin together.
"Lasi nakita ko yun sa sisters ko, sa sister ni David. Once you have babies, ibibigay mo ang time mo 100 percent for them and they will be your priority."
Sa tamang panahon, gusto ni Glaiza na dalawa ang maging anak nila.
"Boy and a girl tapos kambal para isang irihan lang.
"Actually, si David may twin, tapos sa side namin may twins din kami. Baka ako na yung next generation na may twin."
Maganda ang takbo ng showbiz career ni Glaiza at hindi siya nawawalan ng trabaho sa Kapuso Network.
Tiniyak ng aktres na tuloy pa rin siya bilang Kapuso, at masaya siya dahil supportive si David sa kanyang career kahit magkarelasyon pa lang sila.
"Ganun pa rin, wala pa ring pagbabago on our relationship kasi di naman kailangan.
"Ang need lang is mag-compromise. I will go there maybe for a few months and he will go here kasi we are setting up a business here."
UPCOMING PROJECTS FOR 2022
Isa si Glaiza sa mga pinarangalan sa Film Ambassadors' Night ng FDCP.
Para ito sa natatangi niyang pagganap sa pelikulang Midnight In A Perfect World na pinagbidahan nila ni Jasmine Curtis-Smith.
Ayon sa Kapuso actress, ito ang kauna-unahang face-to-face event na dinaluhan niya at proud siyang ka-date si David.
"Exciting. It's been a long time since the last gathering talaga ng mga film actors, film directors.
"I think the last time was in Cinemalaya pa, three years ago pa. It was really nice. It feels amazing to see them again face-to-face.
"It feels surreal na rin na parang, 'O, nandito kaming lahat, totoo nang nangyayari. Even you guys.'
"Parang weird in a way, pero nakaka-excite. I'm thankful na nangyari siya."
Kinamusta rin namin kay Glaiza ang dalawang international films na nakalinya niyang gawin.
"Hopefully, matuloy kasi pabagu-bago yung restrictions. Yung isa sa Canada, yung isa sa Korea.
"Hindi ko alam kung matutuloy since ngayon hindi pa ganun ka-open talaga. But, yeah, I'm looking forward to still doing it."
May isa pang nakalinyang pelikula si Glaiza dito sa bansa.
"Historical film naman siya, family friend namin ang director. Excited ako to work with him, si Danny Marquez.
"Medyo may pagka-Gabriela Silang, pero di ko pa alam kung puwede nang sabihin ko."
Kailan naman ipalalabas ang Kapuso series nila ni Xian Lim na False Positive?
"June na raw," sagot ni Glaiza.
"Hopefully matuloy na talaga. Tapos na naman namin yung taping.
"Nakapag-record na kami ng theme song, so very ready na kami. Ready to air."