Tila ayaw panghimasukan ng GMA-7 top executives ang isyung hiwalayan ng mag-asawang Carla Abellana at Tom Rodriguez.
Hindi maiwasang hingin ang reaksiyon nila lalo pa't isang buwan at kalahati nang tampok ng espekulasyon ang relasyon ng Kapuso couple na kakakasal lamang noong October 2021.
Sa virtual mediacon kasama ng piling press, nakapanayam sina Lilybeth Rasonable (Senior Vice President for Entertainment Group), Joey Abacan (First VP for Program Management Department), at Nessa Valdellon (GMA First VP for Public Affairs).
Ginanap ito Biyernes ng hapon, March 11, 2022.
"Yung personal life, we hope it will work out for them. But you know, that's their personal life," maingat na saad ni Rasonable.
Ang malinaw ay may kanya-kanyang proyektong gagawin sina Carla at Tom sa GMA-7.
Sabi ni Rasonable, "Last project nila together was Love of My Life. Tom had a big guest role there.
"So, now, Carla is going to do something else. But that was pre-planned even before they got married.
"So I don't think naman it should be a problem.
"There are projects for them, but separately, kasi kakagawa lang nila together, e."
May gagawin daw si Carla na "big guest role" sa isang malaking TV project, bago ito muling bibida sa sariling soap.
Si Tom ay may nakalinya rin daw na proyekto sa GMA-7, ayon pa rin kay Rasonable.
Read: Tom Rodriguez and Carla Abellana's love story: a timeline
DRAWING THE LINE BETWEEN PROFESSIONAL & PERSONAL MATTERS
Para naman kay Abacan, hindi raw siya basta-basta nakikialam sa personal na problema ng mga artista.
Liban na lang kung alam niyang makakaapekto sa trabaho, siguradong kakausapin daw niya ang artista.
Saad niya, "Of course, kung ikaw ang naatasan na para bang, 'O, nag-aaway yung dalawang artista mo.'
"And they're supposed to be love teams or mag-asawa sila, maaapektuhan yung show, there are times makikialam at makikialam ka on a personal level.
"Pero sa professional level, we have to be firm, 'This is going to affect the show.' And if it's going to affect the show, I will get affected as well."
ONLY WHEN THEY'RE ASKED FOR ADVICE
Hindi direktang tinukoy ni Abacan sina Carla at Tom.
Aniya, generally speaking, may mga artistang nagiging kaibigan ang GMA-7 execs.
"On a personal level, if you ask me, 'Dapat ba hiwalayan ko na yung asawa ko?' I will give you my personal advice, ganun, as a friend.
"Pero basta huwag lang maapektuhan yung show, okay ako. That's how it is.
"Of course, it would be nice if they ask you. Ayaw mo maparatangan na, 'Ba't ka ba nakikialam? Di naman ikaw yung asawa, di ba?'
"Dapat ingat na ingat ka rin dun."
Nang si Vandellon naman ang hingan ng reaksiyon, sabi lang niya, istrikto ang Public Affairs pagdating sa work environment.
"Wala kaming ganyan. Bawal mag-asawa sa department namin," simpleng saad niya.
THE BREAKUP AND ALLEGED THIRD-PARTY ISSUE
January 2022, unang inulat ng PEP.ph (Philippine Entertainment Portal) ang hiwalayan nina Tom at Carla.
Umugong ang espekulasyong third party diumano ang mitsa nito, at lalo iyong kumalat dahil sa pag-like ni Carla sa isang netizen na tinawag si Tom na "cheater."
Read: Carla Abellana reacts to netizen calling Tom Rodriguez a "cheater"
Kinumpirma ng ama ni Carla na si Rey PJ Abellana na "not okay" sina Carla at Tom sa ngayon.
Napag-alaman din ni Rey PJ na may isyu umanong "one-night stand" sa alitan ng mag-asawa.
Pero umaasa si Rey PJ na sana ay magkaayos pa rin ang mag-asawa.