"Finally my forever."
Ito ang kilig na anunsiyo ni Miss Universe Philippines 2016 Maxine Medina sa engagement nila ng nobyong diving instructor na si Timmy Llana.
Sila ay magdadalawang taong magkasintahan na sa June 14, 2022.
Isang romantic proposal ang inihanda ni Timmy sa bakasyon nila ni Maxine sa Club Paradise resort sa Coron, Palawan.
Makikitang tila nasorpresa at puno ng emosyon si Maxine, base sa litratong ibinahagi niya sa Instagram ngayong Lunes, April 4, 2022.
Napatakip pa si Maxine ng mukha habang nakaturo si Timmy sa ibinigay niyang engagement ring na may malaking teardrop diamond stone.
Naganap ang proposal sa tabing-dagat, at kasama ng couple ang ilan sa mga malapit sa kanila.
CELEBRITY REACTIONS
Agad na nagpaabot ng congratulatory messages ang First Lady co-stars ni Maxine na sina Sanya Lopez, Cassy Legaspi, Kakai Bautista, Thou Reyes, at Pancho Magno.
Pati ibang celebrities na sina Ruffa Gutierrez, Marco Gumabao, Ritz Azul, at RR Enriquez ay masayang bumati kay Maxine.
Ang kapwa beauty queens ni Maxine na sina Winwyn Marquez, Nicole Cordovez, at Rachel Peters ay kinilig din para sa kanya.
