Nagsalita na si John Marcelino Rosaldo, ang Nursing graduate mula sa Lorma Colleges, La Union, na hindi raw pinamartsa sa graduation ceremonies.
Viral ang kuwento ni John nang mag-post ang kanyang nakababatang kapatid na si Celene Rosaldo sa social media noong June 23, 2022, araw ng graduation.
Ani Celene, pinaalis si John mula sa pila ng mga graduates na aakyat sa entablado dahil hindi na-confirm ang kanyang payment ng graduation fee sa halagang PHP2,750.
Ang official statement ni John ukol sa pangyayari ay ibinahagi sa Facebook post ng former actress na si Joy Ortega, na elected board member ng District 1 ng La Union, ngayong June 28, 2022.
Kasama ni John Marcelino Rosaldo ang kanyang ina nang nakipag-usap kay Board Member ng District 1 ng La Union Joy Ortega (nakatalikod).
Base rin sa posts ni Joy ay dumulog sa kanya si John at ang kanyang ina kaugnay ng insidente.
JOHN’S VERSION OF THE INCIDENT
Idinetalye ni John ang pangyayari sa kanyang two-page official statement.
Lumalabas na nagkaroon ng miscommunication kaugnay ng graduation fee, na siyang naging dahilan para hindi siya payagang makamartsa sa graduation day.
Tanghali raw ng June 22, ipinadala ni John ang kanyang bayad na graduation fee sa bank account ng school via GCash.
Hindi raw agad nabasa ni John—na noon ay nasa clinical duty—ang message ng accounting office na hinihingi ang screenshot ng proof of payment ni John.
Gabi na nang maipadala ni John ang screenshot ng digital receipt sa accounting office at sa kanyang adviser.
Kinabukasan, June 23, araw ng graduation, panatag si John na wala nang aberyang mangyayari.
Dakong 8:15 a.m., sinimulan ang pagmamartsa sa entablado.
Noong nasa pila na si John, lumapit ang isa sa kanyang clinical instructors (CI) at inabisuhan si John na hindi siya papayagang magmartsa.
Nangatwiran daw si John na binayaran na niya ang kanyang graduation fee, pero sumagot ang CI na sumusunod lamang siya sa utos.
Pagpatak ng 9:00 a.m., lumapit ang isa pang CI at inutusan si John na pumunta sa gilid ng venue.
Doon daw nakita ni John na may mga graduating students din na hindi nakamartsa.
Sinubukan daw silang i-comfort ng kanilang mga CI “because they could not do anything to help us out.”
“Our names were called and our photos were shown on the screen but we were not allowed to go up on stage to receive our diploma and have that ‘significant’ photo-op,” ani John.
Nakaramdam daw si John ng “sadness and humiliation.”
Dakong 10:00 a.m., matapos ang diploma distribution, pinabalik na sila sa kanilang upuan.
Nakita raw ni John ang kanyang ina na galit at masama ang loob.
“She was crying with rage and was insistent to know who was behind what had transpired.”
Umuwi raw si John at ang kanyang pamilya matapos ang programa.
Sa pagkakataong iyon, may natanggap na e-mail si John “and saw the confirmation email of my payment from the accounting office which was delivered at 9:52am that same day, June 23, 2022.”
Himutok ni John, “I felt robbed of the opportunity to make my family proud to see me up on stage, graduating."
TRAUMATIZING EXPERIENCE
Dinamdam daw nang husto ng kanyang ina ang “traumatic experience” na naging sanhi ng “sleepless nights” at “mental breakdowns.”
Ani John, hindi raw deserve ng kahit na sino ang maranasan ang masakit na pangyayaring iyon.
“It is incredibly traumatizing, devastating, and painful, especially for parents and guardians.”
Sabi pa ni John, dapat ay pinayagan pa rin siya ng staff ng eskuwelahan na magmartsa kahit hindi pa nag-reflect ang kanyang payment.
Puwede naman daw i-withhold muna ang kanyang mga dokumento hanggang mapatunayan na nakumpleto na niya ang requirements.
“There was no reason for them to prohibit me from marching. It was unreasonable and unjust on their part,” ani John.
Nabanggit din ni John na nakikipag-ugnayan sa kanya ang school management para makipag-usap.
Ngayong araw rin ay naglabas ng official statement ang Lorma Colleges kaugnay ng kontrobersiya.
Pero sinabi ni John na hindi pa raw sila handang makipagdayalogo dahil sa emosyon at trauma.
Pero tinatanggap daw ng kanyang pamilya ang ipinadalang “apology sent by the college president through e-mail.”
Pagtatapos ni John: “May this be a learning experience to all institutions out there.
“The reevaluation of protocols and policies, must be conducted to avoid such unfortunate incidents in the future.”
Related articles: