Bida sina Therese Malvar at Carlos Dala sa short film na Ang Pagliligtas sa Dalagang Bukid, sa direksiyon ni Jaime Morados.
Kalahok ito sa competition section ng 10th QCinema International Film Festival (Nobyembre 17-26, 2022) na QCShorts.
Read: Triangle of Sadness, Cherie Gil’s last film Elehiya to debut at QCinema 2022
Katunggali nito sa nasabing segment ang Bold Eagle ni Whammy Alcazaren, Luzonensis Mula 7 Hanggang 9 ni Glenn Barit, Mga Tigre ng Infanta ni Rocky de Guzman Morilla, Ngatta Naddaki y Nuang? (Why did the Carabao cross the Carayan?) ni Austin Tan, at Sa Ilog Na Hindi Nagtatapos ni JT Trinidad.
Pahayag ni Therese sa mediacon noong Nobyembre 3, Huwebes, sa Seda Hotel, Quezon City, “Sobrang saya, kasi yung mga kasama ko dito, mga kaklase ko sa school ko and we were able to get Carlos Dala.
“Si Jaime Morados is my classmate, and sobrang ilang years in the making po talaga siya.”
Susog ni Carlos, “Na-witness ko yung development at hirap nitong project na ito. Naisama nila ako sa cast two years ago pa yata, kasagsagan pa ng pandemic. “
And andami niyang pinagdaanan but I’m so happy na natuloy siya, at QCinema pa. Nakakatawa lang, kasi nag-QCinema rin ako last year, yung Henry, and this year, nasa QCinema uli ako.”
Sambot ni Therese, “Pangarap kong mag-QCShorts, so sobrang kinikilig ako, kasali na ako sa QCShorts!”
Hirit ni Carlo, “Ako, pangarap ko rin as a director na mag-QCShorts! Hindi lang pinalad!”
THERESE AS ATANG DELA RAMA
Gumanap si Therese bilang aktres na si Atang de la Rama, na bida sa pelikulang Dalagang Bukid (1919).
Kuwento ni Therese, “Ang Pagliligtas sa Dalagang Bukid is about this boy who tried to save the film Dalagang Bukid nung nasunog ang Malayan Cinema.
“Sa short film, Carlos tried to save me. Sobrang very theatrical ang treatment nila. And nag-studio pa kami.
“Sobrang ganda! Ang ganda ng scoring. It’s a silent film. So, the musical scoring is the main player for this film.”
Saad ni Carlos, “Sabi nga ni Jaime, parang love letter na rin niya ito sa cinema, and Philippine cinema actually.
“Kasi nga, ang Dalagang Bukid ay isa sa first movies na ginawa ng isang Pilipino.” Sabi ni Therese, “Fun fact po — when we were shooting the reenactment scenes of Dalagang Bukid, it was the anniversary for Dalagang Bukid.
“Nalaman namin sa set mismo. Sobrang goosebumps talaga! During that shooting day, it was the anniversary. The day itself.
“So, sobrang ganda na nag-align yung universe sa mga pa-signs nila. Sobrang kilig talaga! Goosebumps! It was a great sign!”
Bale apat na beses nang nagkatrabaho sina Therese at Carlos sa pelikula. Nagkatrabaho rin sila sa isang thesis film (2013), Gasping For Air 1-2-3 (2016), at ang forthcoming film na Pamilya Sa Dilim directed by Jay Altarejos.
Pahayag ni Carlos, “Therese and I come from a kind of similar background na napasok na lang sa showbiz at film na biglaan. Walang training or anything.
“So, yung chemistry, pag naging co-actor ko siya, madali lang. Kasi pareho na kami ng pinanggagalingan.”
Pag-ayon ni Therese, “And the same kami ng passion for film itself. Pinag-uusapan namin ang mga pelikula.
“Kasi pangarap din namin to work behind the cameras. So, parang same interest dun, same passion. Pati mga characters namin sa mga pelikula, pinag-uusapan namin, ganun.”
Dalawang short film na ang naidirek ni Carlos. Una, yung Kahon (2016) na nanalong best short sa CineFilipino filmfest, at pangalawa yung Bakpak (2021) na umikot sa mga international filmfest.
Nilinaw naman ni Therese na ayaw niyang magdirek, bagkus ay gusto niyang mag-produce.
DARING PROJECTS
Hindi nagtagpo ang mga karakter nina Therese at Carlos sa Pamilya Sa Dilim.
Salaysay ng 22-anyos na si Therese, “Ang intense ng Pamilya sa Dilim, sobrang dark po. Actually, kinakabahan po ako sa premiere night.
“As in pinagpapawisan ako every time I have a scene. Kasi sobrang intense ng mga eksena namin.
“And then kami ni Kuya Allen [Dizon], yung dynamics po namin dun… haaayy, so dark! It’s so dark. Parang Insiang-Kisapmata type dynamics.”
Maliit lang daw ang papel ni Carlos sa Pamilya sa Dilim pero malaki ang impact ng karakter niya sa istorya.
“It is like a statement scene,” pakli ni Carlos.
Matindi rin ang papel ni Carlos sa isa pang pelikula ni Direk Jay Altarejos, yung Finding Daddy Blake kung saan naghubad siya.
“Hindi naman po sobrang hubad,” napapangiting sansala ni Carlos. “1-2-3 levels lang naman. Mas malala nga lang ito. Nalaman ko lang nung na-cast na ako.”
Ipinost ang trailer ng Finding Daddy Blake noong Nobyembre 5, Sabado , sa Facebook page ng 2076 Kolektib.
Natatawang sambit ng 21-anyos na si Carlos, “Mapapasabi ka ng, ‘Direk, ready na ako sa daring roles.’ Ganun.”
May isang eksena na tila pinapaligaya ni Carlos ang sarili sa Finding Daddy Blake. Idinaan daw iyon sa magic of cinema.
Kumustang katrabaho ang Cinemalaya 2022 best actor na si Tommy Alejandrino sa Finding Daddy Blake?
Tugon ni Carlos, “Best friend ko talaga yun kaya yung chemistry namin, parang yung sa amin ni Therese. From theater background din siya.
“At yung pedigree niya, sobrang taas. From Makiling din siya, di ba? I mean, mga Alejandrino. Mabilis lang siyang katrabaho, kasi parang wala.
“Magkaibigan kami, so yung inhibitions, madali lang laktawan.”
Nasa cast din ng Finding Daddy Blake sina Dexter Doria, Gio Alvarez, Oliver Aquino, Joyce Peñas Pilarsky, Marc Cubales, Aaron Domingo, at Jonathan Ivan Rivera.
Kaabang-abang din ang pagganap ni Therese sa pelikulang Broken Blooms bilang wife ni Jeric Gonzales.
Nag-shoot din si Therese sa pelikulang Oras de Peligro ni Direk Joel Lamangan bago siya pumuntang Estonia para maging hurado sa Tallinn Black Nights Film Festival (Nobyembre 11-27, 2022) or POFF (Pimedate Ööde Filmifestival).
Read: Therese Malvar, napiling hurado sa Tallinn Black Nights Film Fesival
“First time ko makatrabaho si Direk Joel as a director. Kasi, nakasama ko siya, co-actor, School Service, e,” paliwanag ni Therese.
“Ang saya! Kasi, ang bilis ni Direk Joel. Tapos si Miss Cherry Pie [Picache], ang galing! Grabe! Sobrang natural lang.
“Natural lang lahat. And then yung kahapon ko po na eksena, intense po agad. Nag-iyakan kami.
“And nagkukuwentuhan sila about martial law. Kasi, si Sir Boni Ilagan, the writer of Oras de Peligro, talagang na-witness niya lahat.
“So, yung pagkukuwento niya, ahhm, ang intense din. Nakakaiyak. So, dun nag-sink in sa akin na, ‘Grabe! Ang bigat nga ng ginagawa natin!’
“Kailangan totoo talaga yung ipapakita namin 'coz these are real stories of real people who were victimized ganyan, so yun.”
May socio-political statement ang Oras de Peligro, na ang setting ay Pebrero 1986, bago umalis ng Pilipinas ang Pamilya Marcos.
“Life is political naman talaga. And everything is political. And legit po talaga yung pinakita sa Oras de Peligro,” pagmamatwid ni Therese.
“Yung nangyari lang nung time na yun. Manifestations of every other story during Martial Law. The whole event is a statement itself, e.”