Nalumbay si Carmi Martin nang hatulan si Roderick Paulate ng Sandiganbayan na guilty sa kaso ng graft at falsification of public documents.
Nag-ugat ang kaso kay Roderick noong siya ay nanunungkulan bilang konsehal ng Quezon City dahil sa diumano’y pagkuha niya ng 30 ghost employees mula July hanggang November 2010.
Ang sentensiya sa aktor ay mula anim at walong taon hanggang 62 taong pagkakakulong.
Nagkasama sina Carmi at Roderick sa ABS-CBN programs na Tonight with Dick and Carmi (1988-1991) at Abangan ang Susunod na Kabanata (1991-1997).
“Yun na nga! Yun na nga ang tinatanong sa akin!” bulalas ni Carmi sa mediacon ng pelikulang My Teacher noong Disyembre 12, 2022, Lunes, sa Winford Manila.
“Kasama raw ako dun? Kasi, Dick and Carmi daw?!
“Oh my God! I’m sorry to joke about it. I’m sorry to joke about it pero, you know, I text him.
“I told him, ‘Dick, alam ko naba-bother ka dito. I pray na malampasan mo ito. Pinagpe-pray kita.’
“Kasi, pareho na kaming may maintenance. Kaedad ko yan, magsi-sixty na rin iyan. So, alam ko kung paano naba-bother yan.
“And I feel that na-victimize siya. Na alam mo yun, sabi ko, ‘Ang dami nga diyang big fish, bakit hindi nahuhuli?!’ Ayun…”
Nagkausap na ba sila matapos pumutok ang naturang balita noong Disyembre 2?
“Hindi, e. Parang… noong una, tinext ko siya. I don’t know if he changed his cell number, hindi sumagot,” tugon ni Carmi.
“Pero nung Minessenger ko siya, doon sumagot. Sabi niya, ‘I believe in prayers,’ ganun. Sinabi ko, ‘Masyado akong concerned sa health mo.’
“Nakakalungkot naman talaga. Napakaganda ng ano, napakaganda ng pangalan ni Roderick as an actor.
“He is an icon, di ba? Mula bata… dun ka pa mabiktima…”
Nakaka-bother iyong makukulong ka ng 62 taon. Mahirap lampasan.
“Oo! Diyos ko naman! Ano naman ang gagawin mo dun, di ba?” saad ni Carmi.
“Hindi ko siya minamaliit na whatever. Hindi ko alam, wala ako dun, wala ako sa kuwartong yun. I really don’t know what happened.
“Kaya lang, yung sa akin… I feel that nabiktima siya, and mas maraming big fish diyan, bakit hindi iyon ang unahin?!”