Nasa top trending topic sa Philippine Twitter ngayong Huwebes ng gabi, February 2, 2023, ang pangalan ng singer/TV host/actress na si Karylle.
Ito'y matapos ireklamo ng kanyang fans ang "disrespecting" at "unfair treatment" na nararanasan umano ni Karylle sa mga co-host niya sa ABS-CBN noontime show na It's Showtime, partikular na si Vice Ganda.
Naglipana ngayon sa Twitter ang video clip ng isang segment sa It's Showtime kanina kung saan hindi nagustuhan ng mga tagahanga ni Karylle ang diumano’y pambabara sa kanya ng co-host na si Vice.
Sa 38-second video ay makikitang isinusumbong ni Karylle ang naging paghahanda noon ni Vhong Navarro sa song number sana nito ngunit hindi natuloy dahil ibinigay raw ni Vice ang kantang pinraktis ni Vhong sa iba.
Saad ni Karylle, "Vice, may request si Vhongskie. Kasi last time nagre-rehearse siya sa umaga, tapos binigay mo sa iba yung kanta niya."
Tanong ni Vice, "Anong problema natin, Karylle?"
Sagot ni Karylle, "Hindi, natatawa lang kami kasi isang buwan, pinraktis daw niya."
Sabi ni Vice kay Vhong, "O, e, di sana kinanta mo."
Sumbong pa ni Karylle, "Sa bawat sulok daw ng bahay niya pinraktis niya."
Saad ni Vice sa kanya, "O, okay na yan, Karylle."
Sabay tawa ng iba pa nilang co-hosts na sina Vhong, Jhong Hilario, Amy Perez, Teddy Corpuz, Jugs Julueta, Ion Perez, Ryan Bang, MC, at Lassy.
NETIZENS REACT
Maraming netizens, partikular na ang fans ni Karylle, ang hindi natuwa at tila nabastusan sa ginawa ni Vice.
Anila, hindi deserve ni Karylle ang ganitong pagtrato maging ang maitsapuwera sa programa lalo na't isa raw ito sa mga orihinal at resident host ng It's Showtime.
May ilan din ang kumukuwestiyon sa anila'y pagbawas ng exposure ni Karylle dahil sa pagsulpot ng mga bagong host na sina Kim Chiu, Jackie Gonzaga, Ion, MC, Lassy, at Cianne Dominguez.
Nanawagan din sila sa programa na bigyang pansin ang mga ganitong insidente at huwag nang hayaan pang muling mangyayari.
Saad ng isang netizen (published as is), “I’m sorry but I don’t see the point of adding Cianne, Jackie, Ion, MC, Lassy, Kim Chiu sa Showtime. Like I know ka-close sila ni Vice but giving them MORE exposure than OG showtime hosts like Karylle….that has been on the show for about 13 YEARS just seems so UNFAIR.”
Sabi pa ng isa, “It’s not that I want Karylle out of the show. She’s an OG and I love seeing her there. However, if the show no longer serves her, then maybe it is time to open herself o other opportunities. She’s a very talented artist. She deserves the best.”
Tweet pa ng isang fan, “Nasa live audience ako kanina ng showtime, grabe after madisrespect ni K [Karylle] gusto ko bumaba to hug her. She don’t deserve that treatment. Hindi porket she’s too kind babastusin na lang ng ganun at paulit-uli. Karylle really deserve so much more.”
Mensahe pa ng isang netizen kay Vice, “I hope marealize ni Vice na we’re not trying to throw hate at him, but we want to fair treatment and respect for Karylle.”
Nanggagalaiti namang tweet ng isa, “Ang bastos ni Vice kay Karylle [angry emoji].”
Sabi pa ng isa kay Vice, "Vice, magkaiba po yung pagbibiro sa pagiging bastos!"
May tila suhestiyon pa ang isa sa It’s Showtime management, “Dami na nagrereklamo. Sana makinig kayo. Tanggalin na yung mga bagong dagdag kasi masakit lang talaga sa mata. Bigyan niyo ng exposure sina Karylle, Tyang Amy. Pati sina Jugs & Teddy mas nawalan ng exposure. Palitan na yung opening segment dahil naging comedy bar.”
Samantala, nag-iwan naman ng makahulugang mensahe ang dating It's Showtime co-host na si Kim Atienza para kay Karylle.
Sabi ni Kim: "@anakarylle is one of the kindest souls I know in showbiz. She will never talk negatively against anyone. I love Karylle."
Hindi malinaw kung may kinalaman ito sa pinag-uusapang isyu sa Twitter.
Para naman sa ibang regular na nanonood ng It's Showtime, malinaw na biruan lamang ang sagutan nina Vice at Karylle sa programa. Sanay na ang madlang pipol sa ganitong biruan at asaran ng mga host, kaya hindi raw dapat sineseryoso ang mga ganitong bagay.
At press time, wala pang reaksiyon sina Vice at Karylle tungkol sa isyung ito.