Hindi nakaiwas si Paolo Contis nang isusain siya ni Kiray Celis tungkol sa usaping “manloloko.”
Guest ni Paolo si Kiray sa digital show ng aktor na Just In sa Sparkle GMA Artist Center YouTube nitong March 15, 2022.
Napag-usapan sa episode kung paano nagsimula ang love story ni Kiray at boyfriend nitong si Stephan Estopia.
Inilahad ni Kiray na kagagaling lang niya sa breakup noon at inaliw ang sarili sa paglalaro ng online game na Mobile Legends (ML).
Niyaya niya noong maglaro si Stephan, na best friend ng kapatid ni Kiray.
Nagkapalagayan ng loob sina Kiray at Stephan. Nalaman kasi nilang pareho silang broken-hearted dahil niloko ng mga nakarelasyon nila.
Ani Kiray, “Nagkuwentuhan kami na parang, ‘Ay, niloko ka rin? Oh my gosh, niloko ka rin?!’
“So, dun ko nalaman na lahat ng manloloko isa lang pala ang reason…”
Hirit ni Paolo: “Sige, iaano ko sa yo, parang nagpaparinig ka, e.”
Dati nang inulan ng batikos si Paolo na inakusahang manloloko dahil sa paghihiwalay nila ni LJ Reyes, kasabay ng pagkakaugnay niya sa aktres na si Yen Santos.
Magkarelasyon na ngayon sina Paolo at Yen.
Read:
- Paolo Contis, nagsalita tungkol sa viral TikTok post kunsaan binash si Yen Santos
- Paolo Contis, ayaw magpaapekto sa bashers matapos umamin sa di pagbibigay ng sustento, relasyon nila ni Yen Santos
Pagpapatuloy ni Kiray: “Yung mga manloloko, alam mo, yung partner nila yung sisisihin. Parang, ‘Ikaw kasi, e, kaya ako nagloko kasi ganito.’ Ikaw yung pagmumukhaing masama.”
Diretsang tanong ni Kiray kay Paolo: “Na try mo ba yon?”
Depensa ni Paolo: “No. Ako, to be honest, never akong nanisi sa mga mali ko.”
Kiray: “So, alam mo na mali ka?”
Paolo: “Oo!”
Kiray: “O, e, di good for you.”
Nautal si Paulo sa sumunod na sinabi: “Hindi ako… so hindi… feeling ko kailangan…”
Biro ni Kiray: “Yung host natin nauutal.”
Pagseseryoso ni Paolo: “Ang sa akin lang, kung may ginawa kang mali, be man enough to admit.”
Kiray: “And be responsible…”
Sabat ni Paolo: “Hindi. Iresponsable na nga yung ginawa mo. So be man enough to admit it.
“So say sorry and then try to change for the better.”
Hirit ni Kiray kay Paolo: “Are you better now?”
Sagot ni Paolo: “I’m a work in [progress].”
Sa interview, may mga hirit din si Paolo na matutukoy na alam niyang pangit ang reputasyon niya sa publiko.
Sa isang punto, sinabi ni Kiray na alam niyang ang current boyfriend ang kanyang makakatuluyan.
Sabi ni Kiray kay Paolo: “Mararamdaman mo naman yon pag last na, di ba?”
Pagsakay ni Paolo: “Ah oo! Ah, oo, sige. Sasakyan kita.”
Hirit ni Kiray, bakit tila hindi kumbinsido si Paolo?
Paliwanag ng aktor: “Feeling ko naman kasi kahit anong sabihin ko, hindi maniniwala sa akin yung taong nakikinig, e. [Sasabihin nila], ‘Manloloko!’”
Nasabi rin ni Paolo sa isang punto: “Wala namang naniniwala sa akin.”