Nagpa-release mula sa kanyang exclusive contract sa Advanced Media Broadcasting System (AMBS) at hindi nag-resign si Willie Revillame.
Ito ang ginawang paglilinaw ng isang nakakaalam sa tunay na kuwento bilang pagtutuwid sa kumalat na balitang nagbitiw ang controversial TV host sa kanyang public service at game show sa ALLTV Network, ang Wowowin.
Ayon sa informant ng Philippine Entertainment Portal (PEP.ph), mapagkumbabang ipinarating ni Willie kay AMBS owner at former Senate President Manny Villar ang kanyang desisyon sa pamamagitan ng sulat na ipinadala niya noong unang linggo ng Marso.
Diumano, ayaw ni Willie na maging “burden” pa siya ng AMBS kaya siya na ang nagkusang humiling na ipawalang-bisa ang kanyang kontrata.
Reportedly, hindi maatim ni Willie na hindi siya nagtatrabaho pero patuloy na tumatanggap ng suweldo habang “naka-pause” ang lahat ng mga programa ng ALLTV Network dahil inaayos mabuti ang reach at signal ng television station na pag-aari ng Villar family.
Read: Ilang programa ng ALLTV, pansamantalang magpapaalam sa ere
Co-production venture ng AMBS at ni Willie ang Wowowin, at isinasaalang-alang din daw ng TV host ang kapakanan ng kanyang mga tauhan na may mga binubuhay na pamilya kaya kailangan niyang mabigyan ang mga ito ng pagkakakitaan.
Hindi umano naging madali kay Willie ang pasya nitong iwanan ang ALLTV Network dahil bukod sa malapit sa kanyang puso, parang tunay na kamag-anak ang turing niya sa Pamilya Villar.
Tumatanaw si Willie ng malaking utang na loob mula sa mga Villar na sinuportahan ang lahat ng kanyang mga programa noong nasa ABS-CBN pa siya hanggang sa paglipat niya sa TV5 at GMA-7.
Kung dumating ang panahong kailanganin ng mga Villar ang tulong, nangako umano si Willie na kung wala pa itong ibang commitment, tutulong siya sa abot ng kanyang makakaya.
Mahigit sa 25 million ang followers ng Wowowin sa Facebook at YouTube kaya sa pag-alis niya sa ALLTV, malaki ang posibilidad na ipagpatuloy ni Willie ang pamimigay ng mga tulong sa pamamagitan ng Wowowin sa Facebook at YouTube dahil ito ang hiling ng mga masugid niyang tagasuporta na matindi ang pangungulila sa kanya.
Hindi nawalan ng mga ginagawa si Willie habang hindi napapanood ang Wowowin sa ALLTV dahil nakapag-record siya ng kanyang bagong single sa Viva Records, ang "Binuo Mo," na komposisyon ng award-winning songwriter na si Vehnee Saturno.
Related Stories:
- Willie Revillame, nagpakita ng pruwebang hindi magsasara ang Wowowin
- Willie Revillame hits back at celebrity critics: "Binigyan ko kayo ng tulong dati... tinitira niyo pa ako!"
- Willie Revillame, patuloy sa pagtatanggol sa ALLTV kahit di niya alam ang estado ng Wowowin
- Senator Mark Villar quashes rumors that family-owned TV station is closing down: “Hindi magsasara ang ALLTV.”