Ibinunyag ng dating aktres na si Jewel Mische na nakilala niya ang kanyang American husband na si Alister Kurzer online.
Sa interview sa kanya ni Paolo Contis sa YouTube channel ng Sparkle GMA Artist Center nitong April 12, 2023, inusisa si Jewel kung paano niya nakilala si Alister.
“We met online. Pero it was a Christian site,” nag-aatubiling sagot ni Jewel.
Nagpaliwanag si Jewel kung bakit nag-atubili siyang sabihing nakilala niya ang asawa online.
“Medyo hesitant lang akong sabihin yung online kasi ayoko magkaroon ng impression yung mga tao…
“Ayokong i-promote yung online dating. It doesn’t work all the time,” sabi niya.
Ipinagpatuloy ni Jewel ang kuwento kung paano sila nagkatuluyan ni Alister, na naglilingkod sa online ministry.
Lahad niya, “So it was a Christian social networking and he was there to… alam mo yung counselling online?
“He was there to pray for people or whoever needs counselling.
“Ako naman, nag-join ako kasi, honestly, curious lang ako nung time na yon.”
Inamin ni Jewel na siya ang unang nag-message kay Alister.
“Kasi I bumped into his testimony about Christian life and then na-move ako.
“And I messaged him. I said, ‘I love how you love God,’ yung ganon. Tapos doon kami nag-start mag-usap."
Sa loob daw ng tatlong buwang pag-uusap nila online ay walang ideya si Alister tungkol sa pagiging artista ni Jewel.
“Three months into talking, nagpunta siya sa Pilipinas. A week after, I followed to meet his family and friends sa Michigan.”
Sinabi rin ni Jewel na “mabilis yung mga pangyayari” pagdating sa kanyang love story.
ON LEAVING SHOWBIZ
Si Jewel, 32, ang itinanghal na Ultimate Sweetheart sa StarStruck: The Next Level, ang Kapuso reality-based artista search noong 2006-2007.
Kasunod nito ay pinasok niya ang showbiz. Nanatili siya sa bakuran ng GMA-7 ng apat na taon bago.
Lumipat siya sa ABS-CBN noong 2010 at nanatili roon ng dalawang taon.
Matapos mag-expire ang kanyang two-year contract sa Kapamilya Network, hindi na siya nag-renew ng kontrata upang mag-focus sa kanyang personal life.
Si Jewel ay naninirahan ngayon sa Michigan kasama ang American husband na si Alister Kurzer. May tatlo silang anak na babae.
Ayon sa dating aktres, hindi naging mahirap para sa kanyang iwan ang showbiz dahil hindi naman daw talaga ito ang first love niya.
“Hindi ko pangarap maging artista. I was just plunged into it really young.
“And since showbiz was not my first love, it was easy for me to quit.”
Isa raw sa mga dahilan kaya hindi siya nahirapang magdesisyon ay dahil nakilala na niya noon si Alister.
Kuwento ni Jewel, mas marami pa siyang nire-reject na projects kesa sa tinanggap kaya napu-frustrate siya at ang kanyang management.
“So, nung patapos na yung contract, I was thinking, ‘Should I renew? Should I pursue this?’
“Tapos na-meet ko si Alister, and then napadali yung decision ko kasi magbubuhay-pamilya na kasi. Yun talaga ang gusto ko in the first place.”