Pormal nang sinampahan ng kasong syndicated estafa ng National Bureau of Investigation (NBI) ang presidente at pamunuan ng Flex Fuel.
Sa eksklusibong ulat ng TV Patrol ngayong Miyerkules, August 9, 2023, lumabas umano sa imbestigasyon ng NBI na hindi nila nakitaang may kinalaman ang aktor at TV host na si Luis Manzano sa nangyaring masalimuot na money issue sangkot ang nagpakilalang investors na inirereklamo ang Flex Fuel Petroleum Corporation.
Sa Taguig Prosecutor’s Office isinampa ng NBI ang reklamo laban sa presidente ng kumpanya na si Ildefonso C. Medel, Jr. alias "Bong" at sa labing-isa pang opisyal ng kumpanya.
Lumalabas sa imbestigasyon, humingi ng perang investments sa mga biktima ang kumpanya sa pangakong gagawin silang kasosyo nito.
Ayon pa sa nakasaad sa imbestigasyon, “The above-named executives are the company officers when Flex Fuel has solicited investments from the public under the pretense that their one-time investment will make them co-owners of gasoline stations. This representations, nonetheless, did not materialize.”
Dagdag pa sa imbestigasyon ng NBI, hindi kasama sa nasampahan ng reklamo si Luis kahit isa ito sa incorporators ng kumpanya dahil nag-resign na ito at hindi na konektado sa Flex Fuel noong 2021, taon kung kailan nag-invest ng pera ang ilan sa mga nagrereklamo.
Ayon sa ulat, “His [Luis] name was no longer reflected as such in subsequent years on the Securities and Exchange Commission (SEC) documents, owing to his resignation.”
Kabilang din si Luis sa mga nagreklamo sa Flex Fuel dahil pati siya ay nawalan ng P66-M investment.
Sabi pa ng NBI, “As to the complaint filed by Manzano against Medel, Jr. involving the former’s investment with Flex Fuel, the same is stil pending investigations.
“Meanwhile, coordination with SEC and the Anti-Money Laundering Council [AMLC] has been made.”
Masayang-masaya naman ang kampo ni Luis sa resulta ng imbestigasyon ng NBI.
Pahayag ng kanyang spokesperson na si Atty. Regidor Caringal, “We thank the National Bureau of Investigation for working to obtain justice for investors like our client, Luis Philippe ‘Lucky’ S. Manzano, who appealed to law enforcement authorities to investigate the operations of Flex Fuel Petroleum Corporation.
“He shares his co-investors’ hope for a quick resolution to this matter, and he remains committed to helping efforts to recover the funds that they invested in the company.”
Tumanggi namang magbigay ng pahayag ang pamunuan ng Flex Fuel dahil hindi pa raw nila natatanggap at nababasa ang reklamo.
FLEX FUEL CONTROVERSY
Noong January 31, 2023, iniulat dito sa PEP.ph (Philippine Entertainment Portal) na humingi ng tulong si Luis sa NBI para imbestigahan ang Flex Fuel Petroleum Corporation.
Ipinaliwanag ni Luis sa kanyang sulat kay NBI Director Atty. Medardo de Lemos, sa pamamagitan ng kanyang legal counsel na si Atty. Regidor Caringal noong November 8, 2022, ang kanyang panig ukol sa kinasasangkutang kontrobersiya.
Nakasaad dito na wala nang kinalaman si Luis sa nasabing kumpanya.
Ayon kay Luis, nagpasya siyang alisin ang kanyang interes at nagbitiw bilang chairman of the board ng mga korporasyon ng grupo ng ICM na pinamumunuan ng kaibigan at business partner niyang si Medel.
Si Medel ang chief executive officer ng ICM Group, na nagpapatakbo sa maraming kumpanya kabilang ang Flex Fuel.
Si Medel ay "childhood friend" ni Luis. Siya rin ang "best man sa kasal" nina Luis at Jessy Mendiola noong February 21, 2021.
Kasosyo rin ni Luis si Medel sa isang taxi line at convenience stores.
Ayon kay Luis, lumapit sa kanya ang investors ng Flex Fuel na nais mabawi ang mga perang isinosyo nila sa naturang fuel company.
May pagkakautang din umanong P66 million si Medel sa TV host-actor.
Pahayag pa ni Atty. Caringal tungkol sa paglapit ni Luis sa NBI para imbestigahan ang reklamo ng investors dahil nabigo si Medel na lutasin ang problema: “Various individuals claiming to be investors/co-owners of Flex Fuel have been reaching out to our client for assistance.”
Ipinaliwanag ni Luis sa kanyang affidavit noong December 21, 2022 na itinalaga siya ni Medel bilang chairman of the board ng mga kumpanya nito bilang "one of the guaranties for my investment."
Pero giit ni Luis, "I never took part in the management of the business."
Nagbitiw raw ang Kapamilya star sa kanyang tungkulin at dumistansiya na mula sa ICM group of companies at sa Flex Fuel.
"Bong conducted the business in such a way that operational matters were kept away from me," sabi ni Luis.
Ayon pa kay Luis, inilihim umano sa kanya ni Medel ang mga mahahalagang bagay tungkol sa kumpanya.
Nakasaad din sa affidavit ni Luis na matapos niyang magbitiw mula sa Flex Fuel at sa ibang kumpanya ng ICM noong February 2022, humingi sa kanya ng tulong ang investors.
Ipinarating daw niya ito kay Medel pero wala umano itong aksiyong ginawa.
"Up to now, there are still individuals reaching out to me for help and assistance regarding their investments in Flex Fuel," ani Luis.
Read: Luis Manzano seeks NBI's help to investigate Flex Fuel Corporation