Karagdagang tatlong probinsiya at munisipalidad sa Pilipinas ang nagdeklara sa drag performer na si Pura Luka Vega, Amadeus Fernando Pagente sa totoong buhay, bilang persona non grata.
Ito'y dahil pa rin sa kontrobersiyal na "Ama Namin" o "The Lord's Prayer" performance niya, kunsaan nag-costume siya na mala-Poong Nazareno, sa isang bar noong July 10, 2023.
Read: "Drag art"? Pura Luka Vega draws flak for "offensive" act of "Ama Namin"
Ang Occidental Mindoro, Cebu City, at Laguna ang mga pinakabagong lugar sa bansa na nagpasa ng resolusyon sa pagkakadeklara kay Pura bilang persona non grata.
OCCIDENTAL MINDORO
Noong August 17, inaprubahan ng Sangguniang Panlalawigan ng Occidental Mindoro, sa pangunguna ni Vice Governor Diana Tayag, ang resolusyong nagdedeklara kay Pura bilang persona non grata sa kanilang probinsiya.
Ayon kay Tayag, kinailangan nilang gawin ito para magsilbing aral at hindi pamarisan ng mamamayang Mindoreño ang ginawa umanong kalapastanganan ni Pura sa imahe ng Poong Nazareno.
CEBU CITY
August 16 nang ipasa ng Cebu City ang resolusyong nagdedeklara kay Pura bilang persona non grata sa kanilang lungsod.
Ayon kay Cebu City Councilor Pastor Jun Alcover Jr., ang ginawang panggagaya ni Pura sa Poong Nazareno "offended and disrespected social and cultural values related to the religious beliefs of Cebuanos," lalo na't kilala raw ang kanilang lugar na may maraming bilang ng Kristiyanong mananampalataya.
Ani Alcover, “This August Body supports and values freedom of expression enshrined in the Constitution as an avenue in the valorization of human intellectual and artistic potentials… the limits of freedom must be recognized.
“Cebu is the cradle of Christianity in the Philippines wherein the intersection of religious beliefs and social or cultural values are somehow enmeshed."
LAGUNA
Noong August 14, idineklara ng provincial council ng Laguna ang pagiging persona non grata ni Pura sa kanilang lalawigan.
Sa Facebook post ni Laguna board member Christian Lajara, sinabi niyang napagkasunduan nilang ipasa ang resolusyon dahil ayaw nilang kunsintihin ang pagdisrepeto ni Pura sa kanilang kinagisnang paniniwala at kultura pagdating sa pananampalataya.
Mababasa sa kanyang Facebook post (published as is), "As leaders of our province, it is our duty to uphold the values of respect and dignity towards our fellow individuals.
"We should not tolerate any attacks or disrespect towards our cultures and beliefs.
"By declaring Persona Non Grata, we are reminding everyone that being a celebrity or personality should never be an excuse to offend or insult our traditions and beliefs.
"The province of Laguna stands united with other local governments in expressing our dismay and disappointment, by declaring through a resolution that Mr. Amadeus Fernando Pagente is Persona Non Grata."
Suma tutal, as of August 18, 2023, labindalawang LGUs na sa bansa ang nagdeklara kay Pura bilang persona non grata sa kani-kanilang lugar.
Ilan sa mga nauna nang nagdeklarang persona non grata sa drag artist ay ang lungsod ng Maynila, Dinagat Islands, Cagayan de Oro, Bukidnon, at General Santos City sa South Cotabato, at munisipalidad sa Floridablanca, Pampanga; Toboso, Negros Occidental; Nueva Ecija; at Coron, Palawan.
PURA FACES ANOTHER SUIT
Samantala, maliban sa persona non grata ay nadagdagan din ang kasong inihain laban kay Pura.
Nitong Huwebes, August 17, naghain ng criminal complaint ang mga deboto ng Itim na Nazareno o Hijos del Nazareno Central.
Ang grupo ng Hijos del Nazareno Central ang nangangalaga sa imahe ng Itim na Nazareno tuwing Traslacion sa Quiapo.
Ayon sa kanila, paglabag sa Cybercrime Prevention Act ang video post sa remix performance ni Pura ng "Ama Namin."
Malaking kalapastanganan din daw sa Panginoon ang kanyang ginawa.
Gayunpaman, handa raw silang iatras ang reklamo kung hihingi ng tawad si Pura sa Poong Nazareno.
Bago ito, nagsampa na rin ng kaso ang ilang Christian group leaders na nasa ilalim ng Philippines For Jesus Movement dahil sa paglabag umano ni Pura sa Article 201 of the Revised Penal Code.
Read: Kim Atienza tells Pura Luka Vega her art is "deeply offensive to majority of Filipinos"
PURA: "TELL ME EXACTLY WHAT I DID WRONG?"
Sa pamamagitan ng X (dating Twitter) noong August 10, 2023, naglabas ng reaksiyon si Pura sa sunud-sunod na pagdeklara sa kanya bilang persona non grata.
Ayon sa controversial drag performer, bukas siya sa pakikipag-usap para magpaliwag pero hindi siya binigyan ng pagkakataon.
Saad ni Pura sa kanyang post (published as is), "Tell me EXACTLY what I did wrong.
"I'm open for a dialogue, and yet cities have been declaring persona non grata without even knowing me or understanding the intent of the performance."
Hanggang sa huli ay nanindigan si Pura na form of "art" ang ginawa niyang pagtatanghal kung saan nakapostura siya na mala-poon sa kanyang metallic gold and maroon dress at matching headdress habang tumutugtog sa mabilis na tempo ang Roman Catholic song na “Ama Namin” o "The Lord's Prayer"
Aniya, "Drag is art.
"You judge me, yet you don't even know me."