Naniniwala si Faith Da Silva na may tamang panahon sa lahat ng bagay. Naranasan na raw kasi niya ang mabigo sa isang bagay na gusto niyang makamit.
Ngayon ay dumating na ang panahon na yun para sa Kapuso actress dahil kabilang siya sa mga bida ng bagong yugto ng Encantadia Chronicles na Sang’gre.
Read: Here's what you need to know about Sang'gre, Encantadia spin-off
Si Faith ang gaganap bilang si Flamarra, anak ni Sang’gre Pirena at tagapagmana ng Brilyante ng Apoy.
Kasama ni Faith na bubuo sa Sang’gre ay sina Bianca Umali bilang si Sang’gre Terra; Kelvin Miranda bilang Sang’gre Adamus; Angel Guardian bilang Sang’gre Deia.
Binalikan ni Faith ang pag-audition niya noong 2016 para sa role na Mira sa reboot ng Encantadia. Pero nabigo si Faith at napunta ang role sa Sparkle actress na si Kate Valdez.
Read: The making of Encantadia: how it came to be, what was the original story
"During Encantadia 2016, I auditioned for the role of Mira, anak din po ni Glaiza de Castro and hindi ako nakuha for that.
“Pero kasi I saw the audition and nakita ko si Kate Valdez na para sa kanya talaga iyon.
“Pero hindi ko alam na after six years magkakaroon din pala ng isang karakter na anak din ni Glaiza de Castro,” ayon kay Faith sa panayam nito sa GMA News Online.
FAITH UNDERGOES TRAINING FOR NEW ROLE
Excited na ang TiktoClock host dahil ang Sang’gre ang pinakamalaking proyekto niya simula noong maging isa siyang Kapuso. Kaya pinaghahandaan daw niya ito nang husto, lalo na sa ginagawa niyang training para sa mga maaksyon na eksena sa Sang’gre.
Looking forward din si Faith na nakatrabaho ang buong cast dahil alam niyang mahaba ang lalakbayin nilang magkakasama sa Sang’gre.
"Yung excitement talaga hindi nawawala. For sure, hindi lang sa akin but with the rest of the cast.
"Kami ni Angel, nagkausap kami recently and we were talking about how big of a responsibility this is for us. Hindi lang sa mga Sang'gre, sa aming apat, kung hindi sa buong team because it is such a big project.
"Alam ko maraming nag-abang, six, seven years ang hinintay ng ating mga Kapuso. Alam kong marami po talagang supporters ang Encantadia. We will make sure na kung ano po yung ibibigay namin sa inyo is a quality project and a quality performance.
"We have been preparing for this, kaming mga Sang'gre. We went through an acting workshop. Ang daming preparation na nangyari. I have been working out even pa mag-start itong Sang'gre.”
Pinakilala na rin ang iba pang cast na kasama sa Sang’gre. Ito ay sina Glaiza de Castro, Ricky Davao, Sherilyn Reyes, Bianca Manalo, Luis Hontiveros, Pam Prinster, Vince Maristela, Shuvee Entrata, Vito and Kiel Gueco at si Rhian Ramos.
FAITH’S KAPUSO JOURNEY
Mula sa pagiging contestant sa StarStruck season 6 in 2015 kunsaan nakilala siya bilang anak ng ‘80s teen heartthrob na si Dennis Da Silva, lumabas sa iba’t ibang shows sa GMA si Faith tulad ng Once Again, My Love From The Star, The One That Got Away, Ika-5 Utos, Sahaya, The Gift at Anak Ni Waray Vs. Anak Ni Biday.
Ang tinuturing na breakout role ni Faith ay sa teleserye na Las Hermanas kunsaan nakasama niya sina Yasmien Kurdi, Thea Tolentino, Jason Abalos at Albert Martinez.
Nasundan ito ng kontrabida roles sa mga teleserye na Unica Hija at Maging Sino Ka Man.
Isa ring singer si Faith at nakapag-release na siya ng singles under GMA Playlist titled “Stay” at “Sana Sabihin Mo Na Lang.”
Sa gitna nang pagiging busy sa kanyang showbiz career, nagawa pa rin ni Faith na tumutok sa kanyang pag-aaral at nakapagtapos ng Grade 11 with honors last July sa Jesus Dela Peña National High School in Marikina City.