Kabilang ang singer na si Jimmy Bondoc sa 3,812 na pumasa sa 2023 Bar Examinations.
Si Jimmy, James Patrick Romero Bondoc sa totoong buhay, ay nasa rank 685 ng mga masuwerteng pumasa.
Siya ay nagtapos ng Law sa San Beda University.
Sa panayam niya sa The Philippine Star noong 2017, sinabi ni Jimmy na isa sa pangarap niya ang pumasok sa law school.
Saad niya, "The choice to go into law is really parang a lifelong dream. Bukod dun, siguro para maging mas may silbi ako sa administration."
Noong panahong iyon, si Jimmy ay tumatayong vice president for corporate social responsibility ng Philippine Amusement and Gaming Corporation (PAGCOR).
Na-aapoint naman siyang isa sa board of directors noong 2021 sa ilalim ng pamumuno ni dating Pangulong Rodrigo Duterte.
Natupad niya ang pangarap magtapos ng law at pumasa sa Bar exam sa edad na 42.
Isa sa mga bumati kay Jimmy ay ang Public Attorney's Office (PAO) chief, Atty. Persida Acosta.
Saad ni Acosta sa kanyang post, "CONGRATULATIONS! ATTY. JIMMY BONDOC (ARTIST-SINGER) for passing the 2023 BAR EXAMINATIONS"
Buong pasasalamat naman sa Diyos ang tanging post ni Jimmy sa kanyang Facebook account.
Aniya, "Nasa Aromata lang po kami the whole day, to praise God and to celebrate friendship. EVERYONE is welcome. 3pm to midnight, drinks, prayers, laughter. Glory to God and God alone."
Naging sentro ng kontrobersiya si Jimmy, lalo na ng bashing, noong nakaraang administrasyon dahil sa malimit niyang pagdepensa noon kay Duterte.
Read: Jimmy Bondoc echoes President Duterte's view on ABS-CBN franchise renewal