Pumanaw na ang multi-awarded cinematographer na si Romy Vitug nitong Huwebes, January 18, 2024.
Siya ay 86.
Ang malungkot na balita ay kinumpirma mismo ng anak ni Romy na si Dana Vitug Taylor nang mag-post ito sa Facebook.
Bahagi ng post ni Dana (published as is): "This morning at 6:11pm Philippine time, my TATAY, Romy V Vitug, passed away.
"He was known as the Legendary Cinematographer in the Philippines world of cinema but we have known him as our Dearly Beloved TATAY!"
Kalakip din ng post ni Dana ang paghingi niya ng dasal sa mga nakasama't kakilala ni Romy noong ito'y nabubuhay pa.
Aniya, "Please pray for me and my Family that GOD’S PEACE and COMFORT be upon us as we grieve and mourn for the loss of our Dearly Beloved TATAY.
"TATAY, we will surely miss you. We love you so much! This is not a goodbye but rather until we meet again!"
Noong December 11, 2023, ay umapela ng tulong pinansiyal sa publiko ang isa pa sa anak ni Romy na si Dolor Vitug dahil sa pagkakasakit at pagkakaratay sa ospital ng ace cinematographer.
Ayon noon kay Dolor, si Romy ay tinamaan ng sakit na anemia at nagka-complication ng pneumonia kaya ito na-confine sa Gentri Medical Center and Hospital sa General Trias, Cavite.
Hindi malinaw kung ito rin ang dahilan ng kanyang pagpanaw.
Read: Award-winning cinematographer Romy Vitug nangangailangan ng financial, medical assistance
Samantala, ipinagluluksa ngayon ng film industry ang pagkawala ni Romy lalo na't isa siya sa itinuturing na pinakamahusay na cinematographer ng Pilipinas, na tila namana niya sa namayapa na ring ama na si Honesto Vitug—ang kinikilalang "Ama ng Philippine Photojournalism."
Taong 1969 nang magsimula ang career ni Romy sa industriya ng pelikula't telebisyon.
Ang "Hellow, Soldier"—ang ikalawang kabanata ng trilogy movie ni Lino Brocka na Tatlo, Dalawa, Isa noong 1974—ang unang proyekto ni Romy bilang cinematographer.
Ilan pa sa napakarami at hindi malilimutan niyang pelikula ay ang Pagputi ng Uwak Pag-itim ng Tagak (1978), Alamat ni Juan Makabayan (1979),Salome (1981), Haplos (1982), Kung Mahawi Man Ang Ulap (1984), Paradise Inn (1985), Saan Nagtatago Ang Pag-ibig (1987), Hihintayin Kita sa Langit (1991), Ikaw Pa Lang Ang Minahal (1992), at Saan Ka Man Naroroon (1999).
Noong 2000, ginawaran si Romy ng Lifetime Achievement Award sa Cinemanila International Film Festival , Natatanging Gawad Urian noong Hunyo 2016, at Hall of Fame Award sa 45th Metro Manila Film Festival noong December 2019.