Nagbigay ng update si Rita Daniela ukol sa kanyang date matapos niyang sumalang sa "EXpecially For You" segment ng It’s Showtime.
Sumabak bilang searcher ang Kapuso singer-actress sa popular dating game ng ABS-CBN noontime show noong June 8, 2024.
Ang napili ni Rita na maging ka-date niya ay ang searchee na si DJ Jimmy, na nagpakilalang "sporty DJ ng Makati."
Makalipas ang dalawang linggo, may nabuo na bang ugnayan sa pagitan nina Rita at DJ Jimmy?
“So far, wala pa kaming update doon sa date na nabigay from Showtime,” sagot ni Rita.
Nakausap ng PEP.ph (Philippine Entertainment Portal) si Rita sa press conference ng upcoming GMA-7 primetime series na Widows’ War nitong June 21, 2024.
Rason ni Rita, abala silang pareho ni DJ Jimmy kaya hindi pa sila nakakalabas.
“We’re both busy kasi talaga, lalo na especially with a life of a DJ, right?” paliwanag niya.
Siya naman daw ay abala sa halos araw-araw na taping at trabaho.
“I haven’t actually watched one of his gigs, but definitely I will,” paniniyak ni Rita.
“Hindi lang talaga nagtutugma yung schedule namin.”
Hindi rin itinago ni Rita ang paghanga sa binata dahil sa ilang magandang katangian nito.
“It was nice, he’s really a nice guy, and masipag talaga. Totoo yung sinabi niya, masipag siya and he’s humble, actually.”
Sa tanong kung constant ba ang kanilang communication, sagot ni Rita, “Not so much.”
Paglilinaw ng singer-actress, hindi naman siya umaasang mauuwi sa relasyon ang pagkakakilala nila ni DJ Jimmy.
“I have to say it’s not really an issue kasi kahit naman sa akin, I am not specifically looking for a commitment right now, because I can’t,” saad ng single mom.
Read: Rita Daniela reveals challenges of being single mom, and co-parenting setup
Hindi naman daw siya nagmamadaling makahanap ng lovelife, pero open siya sa pakikipag-date.
“With a happy date, why not? So, okay lang naman sa akin yon. Hindi lang naman si DJ Jimmy, di ba?
“Kung meron, bakit hindi? Basta kaya ng powers, at saka hindi siya stress, hindi siya masyadong drama, why not?”
Read: Rita Daniela finally opens up about her love life through songs
RITA CO-STARS IN WIDOWS’ WAR
Masayang-masaya naman si Rita na nakatanggap ng papuri matapos mapanood ng attendees ng presscon ang trailer ang Widows’ War na pinagbibidahan nina Bea Alonzo at Carla Abellana.
Ang upcoming Kapuso primetime series ay magsisimulang umere sa GMA-7 sa darating na July 1, 2024.
Base sa trailer ay challenging ang papel ni Rita.
Inamin ni Rita na hindi sana niya tatanggapin ang role sapagkat isa siyang hands-on mom. Pero sa huli ay pinili niyang tanggapin ang role dahil sa ganda nito.
“Hindi talaga biro yung character ni Rebecca. Kumplikado at mahirap ang character…” paglalarawan ni Rita.
Ayaw rin niyang palampasin ang pagkakataong makatrabaho ang kanyang idolong si Jean Garcia na tampok din sa teleserye.
Sa tagal daw kasi niya sa GMA-7 ay ngayon lang siya nabigyan ng pagkakataong makasama ang idolong aktres.
Sabi ni Rita, “She’s super my idol. First time ko rin siyang makatrabaho. Sabi ko, ‘Okay, I will really, really do my very best in this project.’”