Mga baguhang artista halos ang kasama ni Elijah Alejo sa bagong pelikulang Field Trip.
Dahil dito, tinanong ng PEP.ph (Philippine Entertainment Portal) sa Kapuso young actress kung may nadarama ba siyang pressure dahil kung tutuusin ay siya ang magdadala ng pelikula.
“Okay, parang naano ako dun ah,” ang natatawang umpisang reaksyon ni Elijah.
“Parang ngayon po ako na-pressure sa question na yun.
“Honestly po, hindi po ako nanakaramdam ng pressure kasi I know naman po na hindi rin po sila ilalagay dito ni direk kung wala pong nakikita si direk in them na makakapag-add to the movie.
“So I know for a fact na lahat po kami dito magtutulung-tulungan regardless of newcomer man or veteran.”
Bilang isang young actress na matagal na sa industriya ng pelikula at telebisyon, may advice ba siyang maibibigay sa mga bago pa lamang nag-aartista?
Ngumiti muna si Elijah bago sumagot.
“Ahmmm ang advice ko lang is, okay yung kinakabahan ka. Kasi iyon din yung advice sa akin nina Papa Wendell, e,” pagtukoy ni Elijah kay Wendell Ramos na co-star niya sa Kapuso TV series na Prima Donnas.
Read: Gina Alajar on teen stars of Prima Donnas: "Kung nagiging problematic sila... makakarating sa akin."
Pagpapatuloy pa ni Elijah, “So okay lang yung kinakabahan ka. Kasi alam mo na kapag kinakabahan ka, alam mo rin na meron kang something na maibibigay talaga dun sa movie.
“Meron kang maibubuga. Alam mong kaya mong makipagsabayan.”
ELIJAH ON FOCUSING ON SCHOOL
Samantala, natanong din ng PEP.ph si Elijah kung may bonding moments pa ba sila ng mga dati niyang kasama sa teleserye na Prima Donnas tulad nina Jillian Ward, Sofia Pablo at Althea Ablan.
“As of now, wala na po masyado,” sagot ni Elijah.
“Kasi si Jill po nasa Abot Kamay [Na Pangarap], so halos every day po yung taping niya.
“Pinagsasabihan ko na nga po na magpahinga kasi nag-o-overfatigue po siya lagi.
“Si Althea naman po busy rin po sa taping ng Forever Young.
“Si Sofia po nagsisimula na po siya for Ang Prinsesa Ng City Jail.”
Read: Atty. Annette Gozon-Valdes, sinabing posibleng "hindi matapos" ang Abot-Kamay Na Pangarap
Ang Forever Young at Ang Prinsesa Ng City Jail ay mga upcoming TV programs ng Kapuso Network.
Pagpapatuloy ni Elijah, “So ako naman po medyo rest po ngayon. Naka-focus po ako sa school kaya hindi rin po magka-ano po yung mga paths namin.”
Bukod sa pag-aartista ay nag-aaral si Elijah bilang first-year college student sa Manila Central University.
Bakit niya napili ang kursong Medical Technology?
“Actually, po hindi ko po iyon first choice.
"E,ang kaso po inisip ko rin po na kung gusto ko po talagang mag-doktor in the future, yung Med Tech po yung kumbaga pinakamaganda.
“E, hindi ko rin po kaya ang Nursing, e.”
Nakausap ng PEP.ph si Elijah sa storycon at mediacon ng Field Trip na ginanap noong June 19, 2024, sa RED Hotel.
Gaganap si Elijah bilang Angela sa Field Trip, kung saan makakasama rin niya sina Jeffrey Santos, Dindo Arroyo, Simon Ibarra, Alex Medina, Dexter Doria, Jennifer Lee, at Poppo Lontoc.
Nasa pelikula rin bilang si Jerry si MJ Manuel—na nominadong Best New Movie Actor sa PMPC’s 40th Star Awards for Movies para sa pelikulang Unspoken Letters—at si Gab Dekit bilang si Rhian.
Ang mga newbie stars na kabilang sa cast ng pelikula ay sina Nicole Alayon, Mika Pardo, Jea Manalo, Natsumi Nose, Abegail Tabiolo, Kate Ronco, Angel Llames, at Ron Medina.
Ang Field Trip ay isang surprise/adventure movie ng PinoyFlix Entertainment Production, Inc. ni Jose “JR” Olinares, na siya ring direktor ng naturang pelikula. Ito ay isinulat ni Eric Ramos at ipapalabas sa Nobyembre 2024.
May pakulo ang PinoyFlix Entertainment Production, Inc. (nina direk JR at Production Manager Sam Faj. Calaca) sa mga manonood ng Field Trip dahil may pa-raffle sila sa mga movie ticket holder, kung saan may mapapanalunang condo unit at marami pang malalaking papremyo.