Aminado si Naldy Gonzales na hindi naging maganda ang paghihiwalay ng bandang Side A at dating lead vocalist nilang si Joey Generoso.
Si Naldy ang keyboardist ng Side A.
Aniya, may mga isyung hindi napag-usapan at naayos bago naghiwalay ang landas ng grupo at ni Joey G.
Taong 2015 nang kumalas sa grupo si Joey G, na ikinalungkot at pinanghinayangan ng mga masusugid na tagahanga ng banda.
Ang current members ng grupo ay sina Naldy, Ernie Severino (drums), Leevon Cailao (lead guitar), Ned Esguerra (bass guitar), at Yubs Esperat (lead vocals and guitar).
Eksklusibong nakapanayam ng PEP.ph (Philippine Entertainment Portal) ang Side A sa mediacon ng Bonded BY Sound: Side A And Janine Teñoso Benefit Show, na ginanap sa Aromata Bar and Resto, noong November 15, 2024.
Dito ay binalikan ni Naldy ang pag-alis ni Joey G sa grupo.
Ayon kay Naldy, hindi diretsong nagsabi si Joey G pero naramdaman nilang gusto na nitong magsolo.
Lahad niya: "Actually, nagparamdam na siya na magpapaalam siya.
"Hindi niya sinasabi nang diretso. Hindi magsasabi nang diretso yun, paparamdam niya na lang.
"Nung nabalitaan ko, 'Yun pala, may intensiyon ka pala, e, di sige na.'
"'Nakita ko na yung chance, ito na yun.'
"Wala pa kaming singer nun, wala pa si Yubs sa picture, wala pa.
"Inano ko na muna, 'Let's stop this thing, magsolo ka na lang.'"
Bunsod nito, tila hindi naging maayos ang paghihiwalay nila ng landas.
Pag-amin ni Naldy: "To be honest, medyo hindi naging maayos kasi there were some issues na di namin napag-usapan.
"Nagkasakitan kami, in a way, na siguro, without us knowing it. Hindi kami aware na nagkakasakitan na kami.
"Siyempre, apology should be there, mayroong tama, mayroong mali. Mahirap lang i-define yun kung sinong tama, kung sinong mali."
Diin pa niya, "Ang punto lang naman dun, hindi na kasi workable na magsama pa.
"Bakit mo pa pipilitin? Yung wavelength, magkaiba na kayo.
"Besides sa music, may mga ibang issues din na personal."
Siyam na taon ang lumipas mula nang umalis si Joey G sa Side A.
Nang tanungin ng PEP si Naldy kung nagkrus na ba ang landas nila ni Joey G, sinabi nitong civil naman sila.
"Nagkikita pa rin kami, pero ganun na lang [kaway], ganun lang," pag-amin niya.
Ibinahagi ni Ned nang magkita sila ni Joey G sa isang birthday celebration na dinaluhan niya sa 19th East, isang music venue sa Muntinlupa City.
Kuwento niya, "Maaga akong dumating, kakakanta lang niya. Nagyakapan kami nung nagkita after a long time, yakapan, 'Kumusta?'"
Dagdag naman ni Ernie, "Kami nagkita rin kami, kasi nagse-session ako sa 'Tawag ng Tanghalan.' Nag-guest siya sa Showtime, nagkita kami dun, nag-picture kami."
Read: Joey Generoso pinagbawalang kantahin ang "Forevermore" sa concert
ON JOEY G NOT ALLOWED TO SING "FOREVERMORE"
Hiningan ng PEP ng reaksiyon ang current Side A members tungkol sa isyung tumanggi si Joey G na kantahin ang sikat na Side A song na "Forevermore" sa isang U.S. concert noong October 2024.
Kaugnay nito, naglabas ng isang mahabang official statement si Joey Benin, dating bassist, vocalist, at composer ng mga kanta ng Side A.
Dito ay sinabi ni Joey na personal niyang hiniling kay Joey G na huwag nang kantahin ang "Forevermore" at iba pang kanta ng Side A.
Ipinaliwanag ni Joey B na nagkakaroon ng confusion sa audience kung sino ang Side A kapag pine-perform ni Joey G ang kanta ng Side A noong soloist na ito.
Sa panayam ng PEP, nilinaw ni Naldy na hindi Side A ang nagbawal kay Joey G kundi ang composer mismo ng "Forevermore" na si Joey B.
"May inilabas na ang ABS-CBN dun, Joey Benin's official statement, basahin niyo na lang.
"Labas kami dun. Ever since naman, wala naman kaming say dun," ani Naldy.
Paliwanag niya, "Sabi ko nga, just to make it clear for those people who think na kami yung nagpigil, no, we don't have the right to begin with.
"Dito sa atin, I don't know if there are laws o may batas na nagsasabi. Sa pagkakaalam lang namin, kung may isang tao man na makakapagsabi ng ganun is the composer.
"Kami, wala naman talaga kami dun, even before na magkakasama pa kami, wala siyang naririnig sa amin."
Ganunpaman, aminado si Naldy na bilang current Side A members ay nabahala sila noong panahong kinakanta ni Joey G ang Side A songs bilang soloist.
"Actually, ginagawa na niya yun before. Yung umpisa was part ng band siya, tumatanggap siya. Kasi namatay na si Wyngard [Tracy], wala na kaming manager.
"Parang nagkanya-kanya. Kami, 'Paano na, ano ang gagawin natin?' Siya, parang lalo siyang umalagwa.
"Unfortunately, tatanggap siya ng gigs tapos kakantahin niya yung kanta namin.
"Ine-explain ko sa kanya, 'Okay lang na mag-perform, pero you're still part of the group, huwag mong kantahin yung kanta ng Side A [mag-isa].
"Para kasing imbes na the whole band is represented with the song, ikaw lang ang kumakanta.
"Although siyempre, siya ang lead singer.
"Although collectively naman, in-explain naman ni Joey Benin, yung song naman na 'Forevermore,' di naman naluwal yan nang basta-basta lang.
"With all the efforts of the band, plus yung iba pang mga arrangements na ginawa ko sa kanya, di ako nag-ano."
Read: Side A on forbidding Joey Generoso from singing “Forevermore”
SIDE A AND JANINE TENÑSO BENEFIT CONCERT
Sa kabilang banda, may halong kaba at excitement ang Side A sa upcoming concert nila kasama si Janine Teñoso, ang Bonded By Sound: Side And Janine Teñoso Benefit Show, na gaganapin sa The Theater At Solaire sa November 30.
Ito ay iprinodyus ng Sonic Sphere Productions Inc.
"Di ba, yung back to back natin parating ka-contemporary namin? First time naming makakasama yung bagets, parang anak na namin," nakangiting pahayag ni Naldy.
"Actually, di ko nga alam kung ano ang mangyayari. Ako naman, iniisip ko yung magiging reaksiyon ng mga tao kasi nga two different generations, sasabay sila sa sounds ni Janine, sasabay siya sa amin."
Sang-ayon ni Ned, "Excited kasi first time naming makakatrabaho si Janine. Hindi rin namin alam what we will expect so nakaka-excite.
"Yung regular na nakikinig kay Janine, pati yung regular na nakikinig sa amin. Excited kami para sa kanilang lahat, kasi parang lahat kami magkakagulatan sa mangyayari."
Read: Jon Santos opens up about looking after ailing mom, husband