Binigyang linaw ni Shuvee Etrata ang estado ng relasyon nila ng kapwa Sparkle artist na si Anthony Constantino.
Ngayong Biyernes, June 20, 2025, nakapanayam ni Aubrey Carampel sa 24 Oras si Shuvee, kasama ang iba pang Kapuso ex-Pinoy Big Brother: Celebrity Collab Edition housemates na sina Ashley Ortega, Michael Sager, Josh Ford, at Vince Maristela.
Ilang araw nang usap-usapan ang namamagitan kina Shuvee at Anthony.
Ito'y matapos salubungin ni Anthony si Shuvee sa outside world nang ma-evict ito sa PBB, kasama ang ka-duo niyang si Klarisse de Guzman, noong June 14.
Read: Shuvee Etrata fulfills dream of becoming a PBB housemate
Sa mga video na kumalat online, makikita si Anthony na may dalang bulaklak at nakayakap kay Shuvee.
May kuha ring nakangiti si Anthony habang kinukunan ng video si Shuvee sa mga sandaling nagpapa-picture sa dalaga ang mga taong nasa labas ng PBB house.
Dahil sa mga kuhang video, tumindi ang hinala ng netizens na hindi lang magkaibigan ang turingan ng dalawa.
May mga nagsasabing si Anthony ay matagal nang nanliligaw kay Shuvee.
Mayroon din namang naniniwala na si Anthony ay nobyo na ng PBB alumna bago pa ito pumasok sa Bahay Ni Kuya.
Read: PBB viewers gush over Shuvee Etrata and Anthony Constantino
SHUVEE REVEALS REAL SCORE WITH ANTHONY
Sa 24 Oras, tinanong ni Aubrey Carampel si Shuvee kung ano ang estado ng relasyon nila ni Anthony.
Bagay na hindi naman inurungang sagutin ni Shuvee.
Pag-amin ng TV host-actress, "Nanliligaw. Nanliligaw yon bago [pa] ako pumasok."
Read: Shuvee Etrata publicly declares Anthony Constantino her "TDH"
Aminado si Shuvee na malaking dahilan ang pagpasok niya sa PBB kung kaya't hindi pa niya sinasagot si Anthony.
Binalaan din daw kasi siya noon ng malapit niyang kaibigan na si Ashley Ortega na hindi tamang sagutin niya si Anthony kung papasok siya sa PBB house.
Pagbabalik-tanaw ni Shuvee: "Sabi talaga nito [Ashley], 'Sige, sagutin mo yan, bawal!
"'E, kasi papasok e, papasok ka. It's the worst thing you could do to a man saying 'yes' na papasok ka ng PBB.'
"Ang hirap, I can't just imagine kung mayroon kami...
"Kasi kahit noong nandoon ako sa loob hirap na hirap ako... wala akong something to hold on to."
Ngayong nakalabas na ng PBB house si Shuvee, gusto pa raw niyang makilala nang husto si Anthony bago ibigay ang matamis niyang "oo" sa baguhang aktor.
Ani Shuvee, "[Sa ngayon] gusto ko pa siyang kilalanin. Manligaw muna pa siya."