Pumanaw na ang isa sa mga pinakakilalang pangalan sa kasaysayan ng pulitika ng bansa, si Juan Ponce Enrile.
Binawian ng buhay si Enrile sa kanyang tahanan ngayong Huwebes ng 4:21 P.M., Nobyembre 13, 2025.
Siya ay 101.
Kinumpirma ng anak ni Enrile na si Katrina Ponce Enrile ang malungkot na balita sa pamamagitan ng social media post ngayong hapon.
Nakasaad dito: "It is with profound love and gratitude that my father, Juan Ponce Enrile, peacefully returned to his Creator on November 13, 2025, at 4:21 p.m., surrounded by our family in the comfort of our home.
"It was his heartfelt wish to take his final rest at home, with his family by his side. We were blessed to honor that wish and to be with him in those sacred final moments.
"He dedicated much of his life to the service of the Filipino people. At this time, we humbly ask for the public’s understanding as our family takes a brief moment to grieve privately and honor his memory together in quiet and in peace.
"Details for public viewing will be shared once arrangements have been finalized, so that all who wish to pay their respects may have the opportunity to do so.
"On behalf of our family, I extend our deepest gratitude for the overwhelming love, prayers, and support we have received during this difficult time. Your kindness means more than words can express."
Sa plenary session sa Senado noong Martes, Nobyembre 11, ibinahagi ni Senator Jinggoy Estrada na si Enrile ay nasa intensive care unit (ICU) ng isang hindi pinangalanang ospital dahil sa pneumonia.
Ayon kay Estrada, sinabi sa kanya ng isang mapagkakatiwalaang source na malabo na ang tsansa ni Enrile na makaligtas.
Nag-alay rin ng ilang sandali ang mga mambabatas para sa dating senador.
Makalipas ang ilang araw ay tuluyan nang binawian ng buhay ang beteranong politiko.
Naulila ni Enrile ang kanyang asawang si Cristina Castañer-Enrile at ang dalawa nilang anak na sina Jack at Katrina.
Read: Juan Ponce Enrile mistulang Cardo Dalisay sa mundo ng pulitika
FAKE NEWS ABOUT ENRILE'S DEATH
Noong November 11 ay kumalat sa social media ang balitang pumanaw na si Enrile dahil sa art card na inilabas ng dalawang daily newspaper.
Ngunit pinabulaanan ito ng veteran broadcaster na si Mon Tulfo, bagamat ayon sa anak ni Enrile na si Jack Ponce Enrile ay anumang oras ay maaari nang bawian ng buhay ang kanyang ama.
Saad ni Tulfo sa kanyang Facebook post: "The report that Juan Ponce Enrile has died is fake news.
"As of 9:08 p.m. today (Nov. 11, 2025), Enrile is still alive, according to his son, Juan 'Jack' Ponce Enrile Jr.
"Jack said, however, his father may go anytime soon."
Kasunod nito ang paglilinaw niya tungkol sa tunay na edad ng dating senador.
Ayon kay Tulfo: "According to official records, Old Man Ponce Enrile is 101 years of age.
"But Jack said records retrieved at the Aglipayan church in Cagayan show that Juan Ponce Enrile was born on June 22, 1922.
"That makes him 103 years old!"
JUAN PONCE ENRILE, POLITICAL SURVIVOR
Kilala si Enrile bilang isa sa mga matagal nang haligi ng gobyerno — mula sa pagiging Justice secretary at Defense minister noong panahon ni dating Pangulong Ferdinand Marcos Sr., hanggang sa pagiging Senate President ilang dekada matapos nito.
Ipinanganak noong Pebrero 14, 1924, sa Gonzaga, Cagayan, si Enrile ay nagtapos ng abogasya sa University of the Philippines at kumuha ng master’s degree sa Harvard University.
Isa siya sa mga pangunahing personalidad sa likod ng martial law noong 1972.
Isa rin siya sa mga bumaligtad sa rehimeng Marcos bago ang EDSA People Power Revolution noong 1986—isang hakbang na nagbago sa takbo ng kasaysayan ng bansa.
Sa kabila ng iba’t ibang kontrobersiyang kinaharap niya — mula sa mga isyu ng korapsyon hanggang sa pagbabago ng paninindigan — nanatiling matatag at aktibo si Enrile sa pulitika.
Dahil dito, tinagurian siyang “political survivor” ng Pilipinas.
Read: Mga alaalang hindi dapat makalimutan tungkol sa EDSA People Power