Isang ulat ang lumabas ngayong araw, January 9, 2026, kung saan umalis na raw sa MediaQuest si Jane Basas, ang president and chief executive officer ng kumpanya.
Ang MediaQuest ang mother company ng mga media arm ng MVP Group of Companies, kabilang ang TV5, The Philippine Star, at BusinessWorld.
Ayon sa ulat ng InsiderPH, bumaba umano si Basas sa kanyang puwesto at nilinis na rin daw ang kanyang opisina sa TV5 headquarters sa Mandaluyong City.
Ang kanang-kamay ni Manny V. Pangilinan sa MVP Group na si Ricky Vargas ang pansamantala umanong mamamahala sa MediaQuest.
Wala pang opisyal na pahayag hinggil sa dahilan ng di pa kumpirmadong pag-alis ni Basas sa MediaQuest, subalit may mga impormasyong nagsasabing posibleng may kaugnayan ito sa maagang pagtatapos ng ABS-CBN–TV5 content partnership agreement nitong Enero 2, 2026.
Ang naturang kasunduan ay orihinal na nakatakdang tumagal hanggang 2027.
Read: ABS-CBN responds to TV5 pulling the plug on content partnership
Dagdag pa sa ulat, nais daw ni Jane na pamunuan ang dalawang kumpanya ni MVP, ang MediaQuest at Smart-PLDT, kung saan meron siyang "senior leadership role."
Pero wala raw kasiguruhan kung ganito nga ang mangyayari.
PEP ASKS AROUND about alleged jane basa's exit
Nagtanung-tanong ang PEP.ph (Philippine Entertainment Portal) sa mga posibleng may alam sa isyu.
Ayon sa mga sources, ngayong araw rin lang daw nalaman sa loob ng MediaQuest ang tungkol dito.
Ang sabi raw ng top management, naka-leave si Jane hanggang January 31, 2026.
At nakasanayan daw nitong maglinis ng opisina tuwing Bagong Taon, kaya’t hindi raw binigyang-kahulugan ng mga kakilala sa trabaho.
Samantala, tungkol sa rason sa umano’y pagbibitiw ni Jane, may nakapagsabi sa PEP na bukod sa aborted partnership sa pagitan ng TV5 at ABS-CBN, posibleng may kinalaman din ang box-office performance ng Manila’s Finest, isa sa mga pelikulang kalahok sa Metro Manila Film Festival (MMFF) 2025.
Ang MQuest Ventures, isang subsidiary ng MediaQuest, ay kabilang sa mga producer ng pelikulang hindi umano nakapagtala ng malakas na kita.
Read: TV5: "ABS-CBN has failed to pay what is due."
Wala pang pahayag na inilabas ang MediaQuest at TV5 ukol sa balitang ito.