Tuluyan nang ipinag-utos ng Sandiganbayan Third Division ang pag-aresto sa aktor at dating senador na si Ramon "Bong" Revilla Jr. at anim na kawani ng Department of Public Works and Highways (DPWH), kabilang sina dating Bulacan Assistant District Engineer Bryce Hernandez at Engineer JP Mendoza.
Ito ay kaugnay ng kasong malversation through falsification of public documents na may kaugnayan sa isang umanong ghost project sa Pandi, Bulacan.
Inilabas ang warrant of arrest laban sa mga akusado ngayong Lunes, January 19, 2026.
Read: Philippine Flood Control Corruption: A Timeline
Ayon sa korte, “no bail” o hindi maaaring makapagpiyansa si Revilla at mga kapwa akusado para sa kanilang pansamantalang kalayaan.
Ibig sabihin, sa oras na maisilbi ang arrest warrant, mananatili sila sa kustodiya ng awtoridad habang dinidinig ang kaso.
Hindi na rin sila maaari pang makalabas ng bansa sa bisa ng hold-departure order.
Bong Revilla faces graft and malversation charges
Noong January 16, 2026, opisyal na naghain ang Office of the Ombudsman ng mga kasong graft at malversation laban kay Revilla at anim pang opisyal ng DPWH sa Sandiganbayan.
Ayon kay Assistant Ombudsman Mico Clavano, may probable cause ang mga kaso dahil sa alegasyon ng pagsasabwatan ng mga akusado sa pagkuha ng milyun-milyong pondo mula sa isang proyektong idineklarang tapos na ngunit kalauna’y napatunayang hindi naman pala naipatupad.
"The Ombudsman will pursue these cases firmly, independently, and without fear or favor.
"The information alleges that the respondents conspired to facilitate the release of approximately PHP76 million for the supposed construction of a flood control project in Purok 5, Barangay Bunsuran, Pandi, Bulacan.
"A project which, based on official inspection and witness accounts, was never implemented," pahayag ni Clavano.
Read: Bong Revilla, Martin Romualdez strongly deny allegations
Lumabas din sa imbestigasyon ng Ombudsman na pineke umano ng mga akusado ang kanilang accomplishment reports, billing documents, at disbursement vouchers para sa nasabing proyekto.
Bukod kina Revilla, Hernandez, at Mendoza, dawit din sina Engineer Arjay Domasig, Emelita Juat, Juanito Mendoza, at Christina Pineda.
Read: Bong Revilla faces malversation, graft raps over flood control
Matatandaang nadawit si Revilla sa flood control scandal makaraang isiwalat ni dating DPWH Undersecretary Roberto Bernardo sa Senate Blue Ribbon Commitee na tumanggap umano ang dating senador ng PHP125 million na kickback mula sa pondo ng flood control projects noong 2024.
Bukod pa rito ang karagdagang PHP24 million na inihatid umano ng kanyang staff sa bahay rin Revilla bago ang halalan 2025, kapalit ng kanyang pag-endorso umano sa flood control projects.
Read: Bong Revilla nag-react sa statements ni ex-DPWH Usec. Bernardo