Kinumpirma ng Criminal Investigation and Detection Group (CIDG) ang pag-aresto sa OPM singer-rapper na si Hev Abi, Gabriel Abilla sa tunay na buhay, matapos siyang mahulihan ng hindi lisensyadong baril.
Sa ulat ng ABS-CBN News ngayong Huwebes ng hapon, April 16, 2026, dakong madaling-araw ng April 14 nang maaresto si Hev Abi sa isinagawang Oplan Paglalansag Omega ng CIDG-NCR sa Barangay Laging Handa, Diliman, Quezon City.
Read: Kathryn Bernardo revisits Bhutan 14 years after Princess and I
Ayon sa awtoridad, isinilbi ang search warrant sa rapper kung saan nakumpiska ang G3 Taurus caliber 9mm pistol, isang magazine, at 15 piraso ng live ammunition para sa nasabing kalibre ng baril.
Bukod pa rito ang narekober na apat na pakete ng hinihinalang cocaine at ilang mga paraphernalia na may laman umanong suspected marijuana.
Read: Colleagues, film industry organizations pay tribute to Sue Prado
Dahil dito, nahaharap si Hev Abi sa mga kasong paglabag sa Comprehensive Firearms and Ammunition Regulation Act at Comprehensive Dangerous Drugs Act of 2002.
Samantala, maliban kay Hev Abi, arestado rin ang anim pang inidibidwal sa isinagawang operasyon ng CIDG.
"We have an asset na nagsasabi na may mga baril ang mga ito posing a danger not only sa community nila maging sa pagiging rapper.
"Yung drug test results, yung rapper, positive sa shabu at sa marijuana. The rest na nahuli positive sa use ng marijuana," pahayag ni Police Col. John Guiagui, chief of CIDG-National Capital Region.
Nasa kustodiya na ng CIDG si Hev Abi at anim pang inidibidwal habang inihahanda ang pormal na sakdal laban sa kanila.
WHO IS HEV ABI?
Si Hev Abi ay bagong saltang singer-rapper sa OPM scene.
Noong 2023, naging tanyag sa social media ang kanta niyang "WELCOME2DTQ."
Sinundan ito ng mga hit na "Para Sa Streets;" "Alam Mo Ba Girl;" "Walang Alam;" "Makasarili Malambing;" "Babaero;" at "C2 Boyz."