Paliwanag at katarungan ang panawagan ng mga magulang ng Nigerian na si Divine Adili kaugnay ng pagkasawi ng 21-anyos na Ateneo Blue Eagles player.
Si Divine at kapwa player na si Rene Baterbonia, 19, ay nasawi habang isinasagawa ang team-building ng kanilang koponan sa Dipaculao, Aurora Province, noong Lunes, June 8, 2026.
Nauna nang sinabi ng Aurora Provincial Police na pagkalunod ang sanhi ng pagkasawi ng dalawang atleta.
Subalit nababalutan pa rin ng isyu ang trahedya dahil sinasabing may kinalaman umano ang isinagawang rigid training sa kanilang pagkamatay.
Dahil dito, humihingi ng paliwanag ang mga magulang ng dalawang basketbolista sa Ateneo de Manila University at sa kanilang coach na si Tab Baldwin.
Si Divine ay nagsilbing rookie center ng Ateneo Blue Eagles men’s basketball.
Ayon sa kanyang mga kaibigan at kapwa players, tahimik subalit maaasahan si Divine.
Kaugnay ng trahedya, ibinahagi ni Dona de Leon, kaklase at matalik na kaibigan ni Divine, na may pangamba ang Nigerian bago siya pumunta ang kanilang koponan sa Aurora para sa training.
“Pinag-usapan lang po namin na sinabi niya po sa akin na takot... hindi naman sa takot na word. Pero parang based sa mga pinagsasabi po ng teammate niya na aanuhin daw sila ni Coach sa training, parang hard training, ganito-ganyan,” sabi ni Dona sa ulat ng ABS-CBN News.
Si Dona ay miyembro ng Ateneo Blue Eagles Women’s Volleyball team.
Read: Rene Baterbonia's mother not satisfied with Ateneo's explanation of son's death
DIVINE ADILI’S PARENTS ASK FOR EXPLANATION
Hindi naitago ni Ifeoma Adili, ina ni Divine, ang sakit na nararamdaman sa sinapit ng kanyang panganay.
Ang pamilya ni Adili ay nasa Nigeria.
“It’s not easy for us, he’s the only hope of this family. He’s our hope, he’s too hardworking, he loves his family,” pahayag ng naghihinagpis na ina sa video call sa kanya ng ABS-CBN News.
Tulad ng pamilya ni Rene Baterbonia, hinihiling ng ina ni Divine sa Ateneo de Manila University nna bigyan sila ng kasagutan sa sinapit ng anak.
Saad niya: “I need an answer, a clear answer from Philippines, from Ateneo Blue Eagle, the coach… Just please, I just need an answer.
“Let me know what happened to my son. Their stories are not the same.”
Katarungan naman ang panawagan ng ama ni Divine Adili na si Elias Adili batay sa kanyang Facebook post.
“I want justice for my Son Chukwuemeka Divine Adili who along others stood in for Nigeria in all Nation Tournament in Philippines in 2024,” mensahe nito madaling-araw ng June 12, 2026.
Pahayag pa ni Elias, “[H]e gave his all to ATENEO BLUES 3rd ranked University in Philippines…”
Mensahe naman nito para sa namayapang anak (published as is), “Divine your Family is highly pained and devastated by your demise out of carelessness, you evaporated like a steam out of our sight, Divine we miss you and our tears seems endless”
Sa hiwalay na ulat ng GMA News Online, sinabi ni Elias na regular silang nagkakausap ng kanyang anak bagamat malayo sila sa isa’t isa.
Noong Linggo, June 7, nakapag-usap pa ang mag-ama. Ipinaalam ni Divine sa ama na papunta ang kanilang team sa Aurora para mag-training.
Iyon na ang huling pag-uusap ng mag-ama.
Lunes, isang staff daw ng Ateneo ang tumawag kay Elias upang ipaalam na nalunod si Divine.
“I’m a fan of Ateneo and I was so much disheartened and disappointed about the whole incident because there were measures that were supposed to be in place before you take people to water and those things were neglected.
"This is a very sad news, very painful news of his demise. I can’t believe he’s gone," pahayag ni Elias sa GMA News Online.
Ayon din sa ama ni Divine, mahusay sa basketball at mabait na bata ang kanyang anak.
Inilarawan pa niya ito na “good character, good manner, very gentle.”
Malaking dagok daw ito sa kanilang pamilya, lalong-lalo na sa ina ni Divine na si Ifeoma.
"We are highly devastated. So, now that he's gone, I don't know where I will start again," sabi ni Elias.
Sa pahayag naman ng embahada ng Nigeria sa Pilipinas, hiniling umano ng pamilya ni Divine na isailalim sa autopsy ang mga labi ng basketbolista bago ilipad sa Nigeria, ulat ng ABS-CBN News.
May panawagan din ang embahada sa Nigerian community sa Pilipinas na maging mahinahon, iwasan ang mga espekulasyon, at huwag magpakalat ng unverified reports habang gumugulong ang imbestigasyon ukol sa trahedya.