Pinuna ng aktres na si Angel Locsin ang pag-amin ng kanyang dating leading man at ngayo'y senador na si Robin Padilla na isa siyang "komunista."
Idineklara ni Robin na "Komunista po ako" sa ikalimang araw ng paglilitis sa impeachment trial ni Vice-President Sara Duterte sa Senado noong Hulyo 14, 2026.
Nangyari ang deklarasyon ng actor-politician habang nagtatanong siya sa nakaupong witness noong araw na iyon, si National Bureau of Investigation (NBI) Regional Director Atty. Jeremy Lontoc, tungkol sa "Operation Romanov."
Nagkatambal sina Angel at Robin sa primetime series na Asian Treasures (2007), na nagsilbi ring huling teleserye ng aktres sa GMA-7 bago siya lumipat sa ABS-CBN.
Read: Bea Alonzo, Vincent Co quietly wed in civil rites
ANGEL LOCSIN ON ROBIN PADILLA's "KOMUNISTA AKO" DECLARATION
Sa pamamagitan ng kanyang official Facebook page ngayong Huwebes ng madaling-araw, Hulyo 16, naglabas ng saloobin si Angel kaugnay ng deklarasyon ni Robin na siya ay komunista.
Ibinahagi ng aktres na noong magkatrabaho sila ay madalas ikuwento ni Robin ang pamumundok at pag-aarmas nito para ipaglaban umano ang bayan. Dinadalaw pa nga raw si Robin ng kanyang ex sa bundok.
Kahit daw paano ay natuwa si Angel sa naging pahayag ng senador dahil nakita raw niya ulit "yung dating Robin Padilla na nakilala ko."
Sabi pa ni Angel, "At least, honest ka ngayon, Kuya."
Kasunod nito ay diretsahang kinuwestiyon ni Angel si Robin kung nasaan daw ito noong panahong nire-red tag siya ng mga kasamahan ng actor-politician.
Saad ng aktres: "Ang tanong ko lang, nasaan ka nung panahong nirered-tag ako kahit alam mong hindi totoo?
"Actually, kasama mo pa nga at kachikahan yung mga nangre-red-tag. Naghugas-kamay at pumikit sa katotohanan."
Read: Ombudsman indicts ex-OWWA chief Arnell Ignacio over land deal
Ang red-tagging ay ang pag-uugnay sa isang mamamayan sa outlawed groups gaya ng Communist Party of the Philippines (CPP), New People's Army (NPA), at National Democratic Front (NDF). Kadalasan, ginagawa ito sa mga mamamayang may kritisismo sa gobyerno.
Ang delikado sa red-tagging ay maaaring maging target ang taong na red-tag ng judicial system at pati na rin ng extra-judicial moves.
Taong 2020, noong kasagsagan ng pandemic, nadawit ang pangalan ni Angel sa isyung red-tagging nang paratangan ni Lt. Gen. Antonio Parlade Jr., dating spokesperson ng National Task Force to End Local Communist Armed Conflict (NTF-ELCAC), ang nakatatandang kapatid ng aktres na si Ella Colmenares.
Ayon kay Parlade, dati umanong miyembro ng CPP, NPA, at NDF si Ella.
Idinawit din ni Parlade ang pangalan ni Angel.
Aniya, noong panahong nasa underground movement si Ella, alam daw ito ni Angel at suportado raw ng aktres ang kapatid.
Mariin itong pinabulaanan ni Angel sa maraming pagkakataon.
Sa panayam niya sa Teleradyo noong October 31, 2020, hindi napigilang mapaluha ni Angel sa walang katotohanang akusasyon sa kanya.
Pahayag niya sa naturang panayam: "I never associated myself with the NPA. He [Parlade] associated me with the NPA.
"Bakit hindi po nila kami idinemanda kung sure na sure sila? Pero hindi, e. Gusto nila, sirain kami sa social media.
"So, wala kaming choice, e. Kino-consider po ng legal team ko ang pagdedemanda rin po.
"Wala po akong masamang hangarin, wala po akong hidden agenda."
Read: Angel Locsin, napaluha sa paratang na may kaugnayan siya sa NPA
ANGEL LOCSIN QUESTIONS ROBIN PADILLA'S STAND ON NATIONAL ISSUES
Sa pagpapatuloy ng Facebook post ni Angel Locsin, direkta nitong kinuwestiyon ang posisyon ni Robin Padilla sa ilang mahahalagang isyu sa bansa.
Kabilang na rito ang pagkampi ng senador kay Apollo Quiboloy, ang religious leader at founder ng Kingdom of Jesus Christ na idineklara ang sarili bilang "Appointed Son of God" and the "Owner of the Universe."
Si Quiboloy ay kasalukuyang nakakulong sa Pasig City Jail habang dinidinig ang mga kaso niyang human trafficking at child/sexual abuse.
Pagkastigo ni Angel kay Robin: "Isa sa mga pinakamalaking dahilan kung bakit ka binoto ng maraming Pilipino ay dahil inasahan nilang magiging matapang kang boses para sa mga kapatid nating Muslim.
"Pero bakit parang mas ipinaglalaban mo pa si Quiboloy? Naniniwala ka ba talaga na siya ang 'appointed son of God'?"
Pinuna rin ni Angel ang sinasabing pagiging "pro-China" ni Robin.
Aniya: "Isa ka sa pinaka-makabayang taong nakilala. Ikaw si Andres Bonifacio.
"Kaya nakakalungkot pag nakakabasa ako ng stand mo pagdating sa China. Hindi ito ang Robin Padilla na nakilala at hinangaan ko."
Gumanap si Robin bilang bayaning si Andres Bonifacio sa pelikulang Bonifacio: Ang Unang Pangulo (2014).
Sa huling bahagi ng kanyang post ay hinimok ni Angel si Robin na gumising na dahil "hindi pa huli ang lahat."
Mensahe ng aktres para sa kaibigan at kasamahan sa trabaho: "Kahit paano, alam kong halos pareho tayong landas na dinaanan.
"Galing sa hirap, nagtrababo ng maaga, tinangkilik at nakapagpasaya ng mga tao.
"Ang utang na loob natin ay sa ating diyos at sa lahat ng Pilipino —hindi lamang sa isang tao.
"Tama na, Kuya. Gising na. Hindi pa huli ang lahat. @robinhoodpadilla"
Habang isinusulat ang artikulong ito ay mayroon nang 108K reactions, 9K comments, at 15K shares ang post ni Angel.
Read: Who is Margarita Gutierrez? Meet Brian Poe Llamanzares' fiancée and DOJ undersecretary