Isa sa pinag-uusapang bahagi ng ika-siyam na araw ng impeachment proceedings laban kay Vice President Sara Duterte ay ang naging kumprontasyon ni Senator Robin Padilla at House prosecution panel head Batangas Representative Gerville Luistro.
Marami pa rin ang nakatutok sa Day 9 ng paglilitis ngayong Miyerkules, July 22, 2026, kung saan libu-libong Pilipino ang sumubaybay sa iba't ibang livestream sa YouTube at Facebook.
Present sa impeachment court sina Senate President Win Gatchalian, Presiding Officer Francis "Chiz" Escudero, at ang mga senator-judge na sina Ping Lacson, Erwin Tulfo, Raffy Tulfo, Robin Padilla, Alan Peter Cayetano, Pia Cayetano, Risa Hontiveros, Kiko Pangilinan, Joel Villanueva, Juan Miguel Zubiri, Bam Aquino, Tito Sotto, JV Ejercito, Lito Lapid, Mark Villar, Camille Villar, Loren Legarda, at Imee Marcos.
Si Luistro naman ang namumuno sa 11-member House prosecution panel at ang kasama nilang private prosecutors.
Dumalo rin ang defense team ni VP Sara na binubuo ng mga pribadong abugado, tulad nina Atty. Sheila Sison, Atty. Michael Poa, Atty. CJ Narvasa, at Atty. Mark Vinluan
Nasa agenda ng pagdinig ang pagpapatuloy ng cross-examination ng defense kay National Bureau of Investigation (NBI) Director Melvin Matibag, witness ng prosecution.
Read: How celebrity lawmakers voted in Sara Duterte impeachment case
ROBIN PADILLA QUESTIONS "ONE-SIDED PROSECUTION
Naging viral ang naging pahayag ni Senator Robin Padilla matapos niyang kwestiyunin ang umano'y pagiging "one-sided" ng House prosecution.
Nagsimula ito nang tanungin niya si Rep. Luistro tungkol sa mga testigong umano'y pabagu-bago ang salaysay at sa posibilidad na may mga witness na nahaharap sa kasong perjury.
Ayon kay Padilla, may ganitong kaso ang dalawang naunang witness ng prosecution na sina NBI Regional Director Atty. Jeremy Lotoc at NBI Senior Agent John Mark Calilung.
Ipinaliwanag naman ni Luistro na wala umanong pending cases ang kanilang mga witness at hindi rin automatic disqualification ang naturang kaso.
"Ang conviction po ay hindi ground for disqualification unless it is final and unless it is punishable by more than one year, and that the crime constitutes moral terpitude," paliwanag ng congresswoman mula sa 2nd District ng Batangas.
Hindi nasiyahan si Padilla sa naging paliwanag, at dito niya binitawan ang viral niyang statament.
Aniya: "Alam niyo po, napakaganda po ng inyong sagot.
"Sana, hindi one-sided ang ating prosekusyon. Kasi alam niyo, pag pabor sa inyo…"
Hindi niya naituloy ang kanyang pahayag matapos marinig ang tawanan at bulung-bulungan mula sa audience sa loob ng Senado.
Agad niyang pinagsabihan ang mga nasa gallery at humingi ng aksyon kay Presiding Officer Escudero.
"Presiding officer, bawal po ang ginagawa nitong nasa harap natin. Nagkokome-komento.
"Hindi po sila allowed mag-ingay. Korte po ito!" saad niya nang may halong pagkainis.
Kaagad namang sinaway ni Escudero ang audience.
"I was interrupted!" tumaas ang boses na sabi ni Padilla nang magpatuloy siya.
Matapos nito ay itinuloy rin ni Padilla ang pagtatanong kay Luistro, kabilang ang kanyang opinyon tungkol sa mga senator-judge na naharap sa kaso at nakulong.
Hindi ito sinagot ng prosecutor at ibinalik ang usapan sa mga testigo.
Nang humiling si Luistro ng paglilinaw sa tanong, binuweltahan siya ni Padilla: "Alam niyo po malinaw na po yung sinabi ko and wala kayong karapatang magtanong sa senator judge."
Tinanong din ni Padilla ang prosecutor kung bakit kasama sa usapin ang International Criminal Court (ICC).
Sagot ni Luistro, bahagi ito ng diskusyon dahil nabanggit mismo ito ni NBI Director Matibag sa kanyang testimonya.
Read: Boss Toyo apologizes after Kara David documentary backlash
TULFO QUESTIONS TIME LIMIT
Kasunod ng palitan nina Padilla at Luistro, humingi naman ng paglilinaw si Senator Raffy Tulfo tungkol sa ipinatutupad na time limit para sa mga senator-judge.
Napansin niyang dalawang minuto lamang ang nakasaad na limitasyon, ngunit umabot na sa mahigit 11 minuto ang pagtatanong ni Padilla.
"Bakit kapag sa kabila, pinapayagan sila na 5 to 10 minutes pero kapag sa amin sa majority, kina-cut agad pagdating ng two minutes?
"I think nakakahalata na kami. So, dapat kapag sinabing two minutes, two minutes!"
Ipinaliwanag naman ni Escudero na walang majority o minority sa impeachment court at maaari siyang magbigay ng dagdag na oras kung kinakailangan.
"Senator Lacson requested earlier additional time to finish his point, which the chair allowed," pahayag niya.
PADILLA QUESTIONS MATIBAG
Nagpatuloy pa rin sa pagtatanong si Padilla, ngunit sa pagkakataong ito ay si NBI Director Melvin Matibag na ang kanyang kinausap.
Kinumpirma muna ng actor-politician kung si Atty. Matibag ang nangumbinsi sa kanyang tumakbo sa Senado noong 2022.
Pagkatapos ay inusisa niya ang umano'y koneksyon nito kay dating Pangulong Rodrigo Duterte.
"Sumama po ako sa inyo dahil alam ko na isa po kayo sa arkitekto ng pagkapanalo ni President Rodrigo Roa Duterte. Tama po ba?" tanong ni Padilla.
Mariin itong itinanggi ng NBI director.
Paglilinaw ni Matibag: "Hindi po. Sapagkat noong 2016, ako po ay campaign manager ng Region IV-A ni Secretary Mar Roxas."
Sinundan ito ni Padilla ng tanong kung si Matibag ay isang political operator na kayang magpanalo o manira ng kandidato.
Tugon ni Matibag: "Ang political operator, to be successful, kailangan po, yung kanyang sasamahan ay magtagumpay ang kanya pong laban at adbokasiya."
Read: ASK MERALCO: How aircon setting, inverter, brand affect eletric bill
MATIBAG JOKES: "ASKED AND ANSWERED"
Nagkaroon din ng nakatutuwang sandali habang kino-cross-examine ng defense counsel na si Atty. Mark Vinluan si Matibag.
Sa mga nakaraang araw, ilang ulit nang pinutol ni Escudero ang paulit-ulit na pagtatanong gamit ang katagang "asked and answered."
Kaya naman ikinagulat ng marami nang mismong si Matibag ang pabirong sumagot ng "asked and answered" sa isa sa mga tanong ni Vinluan.
Natawa sina Vinluan at Escudero, ngunit pinaalalahanan ng presiding officer ang witness na siya lamang ang maaaring gumamit ng naturang pahayag.
PROSECUTION APOLOGIZES TO PADILLA
Sa press conference matapos ang Day 9 proceedings, inamin ni private prosecutor Atty. Lorna Kapunan na kabilang siya sa mga napatawa sa naging pahayag ni Senator Robin Padilla tungkol sa pagiging "one-sided" ng prosecution.
"We’re very appreciative that Senator Robin always brings color and surprise and excitement.
"Especially if he’s the last one to manifest, e, nagigising po kaming lahat. Kanina talaga, nagising kaming lahat at pinagalitan pa kami sa front row," sabi ni Kapunan.
Humingi rin siya ng paumanhin sa senador.
"May I use this opportunity to apologize to senator-judge Robin. There was no intent to disrespect him," saad niya.
Ipinaliwanag din niyang normal lamang sa mga abogado ang kusang reaksiyon habang nasa gitna ng paglilitis.
"Siyempre pag lawyer ka at nasa litigation ka, e-emote ka, e. Mag-eemote ka.
"Alam naman nila yung… hindi naman emote na drama. It is an instinctive reaction," saad ni Kapunan.
Gayunman, nilinaw nyang likas na may paninindigan ang bawat panig sa kaso.
"The prosecution really is for the prosecution, and the defense is for the defense. As we say, it is the nature of the beast," pahayag ni Kapunan.
Dagdag naman ni Rep. Gerville Luistro: "Apparently, this impeachment trial is adversarial. Maliwanag yon.
"Kaya merong prosecution, is to establish the case. Kaya may defense, is to defend the innocence of the respondent.
"So, it is very much anticipated that the prosecution is bias towards presenting the case, presenting the evidence.
"Siguro mas nakakapagtaka pag naging neutral ang prosecution.
"At lalong nakakapagtaka kung ide-defend namin yung respondent."
Hirit pa ni Lusitro: "Yung siguro sinasabing dapat neutral, that applies to senator judges."
Si Padilla ay kilalang masugid na tagasuporta ng ama ni VP Sara Duterte na si dating Pangulong Rodrigo Duterte, na kasalukuyang nakapiit sa The Hague, Netherlands.
Read: James Graham on unexpected coming out: "I'm still in shock."