Hindi nagkakalayo ang mga karanasan nina Miss Universe 2015 Pia Wurtzbach at Miss Universe 2020 Andrea Meza dahil parehong may isyu tungkol sa mga gown na kanilang ginamit nang manalo sila.
Kung may pagkakaiba man, lumipas muna ang anim na taon bago pinaratangan si Pia na kinopya lamang mula sa ibang fashion designer ang kanyang iconic royal blue gown na isinuot niya sa coronation night ng 64th Miss Universe noong December 20, 2015 sa Las Vegas, Nevada.
Ang Filipino fashion designer na si Albert Andrada ang gumawa ng royal blue gown ni Pia nang koronahan ito bilang 64th Miss Universe.
Napakalaki ng pagkakahawig ng gown design ni Andrada sa royal blue gown na nilikha ng Russian couturier na si Rubin Singer at ginamit ng American singer-actress na si Keke Palmer.
Sinuot ni Keke ang gown nang dumalo siya sa 66th Primetime Emmy Awards na idinaos sa Nokia Theatre, Los Angeles, California, noong August 25, 2014.
Kahit hindi si Pia ang dapat sisihin, siya ang inakusahang nangopya dahil sa magkahawig na hitsura ng mga gown nila ni Keke.
ANDREA MEZA, CARRIE UNDERWOOD
Kung inabot ng anim na taon bago napansin ang malaking pagkakapareho ng mga gown nina Pia at Keke, mabilis namang napuna ng matatalas na mata ang diumano’y hindi original design ng red fringe gown ni Andrea Meza ng Mexico nang magwagi ito bilang 69th Miss Universe noong May 16, 2021 sa Hollywood, Florida.
Si Ivis Lenin ng Mexico ang designer ng gown na isinuot ni Andrea sa long gown competition ng 69th Miss Universe.
Nang manalo ang kanyang kababayan, inilagay ni Lenin sa Instagram account nito ang larawan ng damit.
May caption itong “Gracias por confiar en mi y hacerme parte de este sueño que hoy es una realidad. Mexico tenemos nuestra tercera miss universo [Thank you for trusting me and making me part of this dream that is now a reality. Mexico we have our third Miss Universe]."
Pumalag ang Kuwait-based Lebanese designer na si Nadim Soudaiha sa panggagaya ni Lenin sa gown na nilikha niya noong 2017 para sa fashion house na La Bourjoisie.
Sinabi ni Nadim sa panayam ng Kuwait Times noong May 25, 2021 na ikinagulat niya ang intellectual theft na ginawa ni Lenin sa kanyang four-year-old gown.
“Actually the international media found out the dress that Miss Universe was wearing during the ceremony was copied from my design, but in a different color,” rebelasyon ni Nadim.
May mga ebidensiya si Nadim na makapagpapatunay na biktima siya ng pangongopya.
Ito ay ang Instagram post niya noong May 23, 2017 sa gold gown na kanyang tinutukoy.
Pati na ang Instagram post ng La Bourjoisie na nagpasalamat sa American singer na si Carrie Underwood dahil ginamit nito ang naturang damit nang maging host siya ng 51st Annual Country Music Awards noong November 9, 2017 sa Nashville, Tennessee.
“It took me around 10 days to design this dress that was made from tulle with Swarovski crystals and fringe beads but stylist Jacob de Alba revealed in an Instagram post that Andrea’s gown was designed by Ivis Lenin, and that this haute couture dress took almost a year to put together,” dagdag na pahayag ni Nadim sa Kuwait Times tungkol sa kanyang kontrobersiyal na gown na kinopya umano ng Mexican designer ng kasuotan ni Andrea sa 69th Miss Universe.
Use these Klook promo codes when you shop or order online. Marami pang ibang coupons dito.