Kinumpirma ni Willie Revillame na mapapanood si John Lloyd Cruz sa GMA-7.
Magsasama sila sa 6-6 Shopee Super Mega Fiesta at mapapanood ito sa Kapuso Network sa Linggo, June 6, 2 pm.
Si Willie ang blocktimer producer ng nabanggit na television special na magaganap sa Smart Araneta Coliseum at siya ang personal na nakipag-usap kay John Lloyd para sa special guesting nito.
Ang nalalapit na paglabas ni John Lloyd sa television special ni Willie ang unang pagkakataon na makikita ang multi-awarded actor sa isang live show matapos na pansamantala niya na tinalikuran ang show business noong October 2017.
Ito rin ang pangalawang beses na mapapanood siya sa isang programa sa GMA-7.
Ang guesting ni John Lloyd sa "Sumalangit Nawa" episode ng Kakabakaba Adventures ang una at huling appearance niya noon sa isang show ng Kapuso Network.
Ang Kakabakaba Adventures ang horror anthology show ng GMA-7 na napanood mula 2004 hanggang 2005.
Ibinahagi ni Willie sa PEP.ph (Philippine Entertainment Portal) ang video ng pagpirma ni John Lloyd ng kontrata sa kanyang production company.
Naganap ito kagabi, May 29, sa H Bar ng Wil Tower Mall sa Quezon City.
Saksi sa contract signing ni John Lloyd ang legal counsel ni Willie na si Atty. Ferdie Domingo at ang mga Shopee executive.
“Tonight is history,” ang sabi ni Willie tungkol sa pagpayag ni John Lloyd na maging guest sa kanyang television special sa June 6.
Nagbitaw rin si Willie ng nakakaintriga na salita na, “More to come. Welcome to your new family, my production…” tungkol sa inaabangan na paglabas ni John Lloyd sa GMA-7.