Nakapagpapangiti at malakas ang hatid na good vibes ng graduation photo ni Unan M. Napoles, ang one-year-old female Mini Bichon Frise pet dog ng showbiz couple na sina Kim Molina at Jerald Napoles.
Nagtapos si Unan ng Bachelor of Arts in Obedience and Potty Training, Major in Hula Hoop Jumping sa Milo and Friends Dog Academy kahapon, July 31.
Inilabas ngayong gabi nina Kim at Jerald ang uber cute official graduation photo ni Unan na nakasuot ng toga at nakapagpapasaya sa panahong naghahanda ang mga residente ng Metro Manila sa Enhanced Community Quarantine na muling ipatutupad ng pamahalaan mula August 6 hanggang August 20 dahil sa tumataas na kaso ng COVID-19 at ng kinatatakutang Delta variant.
Tunay na tao ang trato nina Kim at Jerald kay Unan na ipinagmamalaki nila na nagtapos bilang Cum Laude sa batch nito.
Ang dog trainer na si Tristan Huertas na nakilala at naging kaibigan ni Kim sa shooting ng Unforgettable ang professor ni Unan sa Milo and Friends Dog Academy.
Ang Unforgettable ang 2019 movie ng Viva Films at si Milo, ang aso na pag-aari ni Tristan, ang gumanap na Happy, ang co-star nina Sarah Geronimo at Kim.
Unforgettable para kay Tristan ang pagtulong na ginawa nina Sarah at Kim nang sumailalim siya sa heart bypass surgery noong March 2021 kaya lubos ang pasasalamat niya sa mga singer-actress na nagbigay sa kanya ng financial help.