Ang kampo ni Senator Manny Pacquiao ang napaghihinalaang nagpapalutang ng balita na ang broadcaster na si Raffy Tulfo ang kakandidatong bise presidente o running mate niya sa halalan sa May 9, 2022.
Pero mahigpit itong pinabulaanan ng isang TV5 insider sa Cabinet Files.
Sinabi ng TV5 insider na senador ang tatakbuhin ni Raffy sa eleksyon sa susunod na taon.
Ito raw ang sinabi ng broadcaster nang magpaalam siya at hingin ang basbas ng management ng Kapatid Network.
Suportado umano ng TV5 management ang pagtakbo ni Raffy bilang senador kaya walang katotohanan ang kumakalat na balitang siya ang magiging bise presidente ni Pacquiao.
Nagdeklara na si Pacquiao ng kanyang kandidatura bilang presidente sa 2022 elections.
Itinuwid din ng Cabinet Files source ang isyung kakandidato si Raffy sa ilalim ng partido ni Pacquiao, ang PDP-Laban (Pacquiao and Senator Koko Pimentel faction).
Wala raw anumang partido na kinaaaniban si Raffy dahil independent candidate ito sa halalan sa 2022.
Mag-uumpisa sa October 1 at matatapos sa October 8 ang paghahain ng kandidatura ng mga personalidad na nangangarap maluklok sa puwesto.
Tiniyak ng Cabinet Files source na ihahain ni Raffy sa Commission on Elections ang senatorial bid nito bago matapos ang deadline sa October 8.