Mga celebrity ang contestant sa bagong season ng Philippine edition ng Family Feud .
Ayon kay GMA-7 Senior Program Manager Enri Tangon-Calaycay, puwedeng sumali sa game show ang mga artistang may real-life feud kung papayag silang makaharap ang isa’t isa.
Magbabalik sa susunod na Lunes, March 21, 2022, ang Family Feud na ihu-host muli ni Dingdong Dantes. Mapapanood ito sa timeslot na nabakante ng Wowowin, ang game at public service program ni Willie Revillame.
Nang tanungin kung may nararamdaman siyang pressure, mabilis ang naging sagot ni Dingdong.
“Siguro naman, kahit saan timeslot kami mailagay, kailangan talaga husayan nang one hundred percent kasi isang blessing na mabigyan ng ganoong klaseng show.
“Isang karangalang mag-host ng isang napakasikat na game show sa buong mundo. So, regardless of timeslot, I think dapat talagang 100 percent talaga yung commitment mo,” saad niya.
Binata pa si Dingdong nang maging game master siya ng Family Feud noong 2009. Ngayong may asawa at mga anak na siya, ang pagkakaiba niya bilang host ng bagong edition ng programa ang itinanong namin sa kanya sa digital media conference na naganap nitong Lunes ng hapon, March 14, 2022.
“Siguro yung experience,” nakangiting sagot ni Dingdong.
“Yung sa loob ng ten years, ang dami kong mga natutunan and, I think, ang pinakamahalaga ay nagkaroon ako ng pamilya in the last years.
“And as a host, kung ihahambing ko sa isang tahanan, di ba, when you welcome people, the more experienced you are, the better host you can become. Ibig sabihin, mas maaalagaan mo sila.
“Mas alam mo yung puwedeng pag-usapan dahil na-experience mo na ‘yan regardless of age.
"Pero I think masuwerte ako na kahit noong bata-bata ako, siguro mga 29 years old pa lang ako, na-experience ko na rin yun. Pero I think mas okay ngayon.”