Dahil sa tagumpay ng Ben X Jim na pinagbidahan nina Jerome Ponce at Teejay Marquez noong 2020, muling gumawa ng Boys Love (BL) Series ang Regal Entertainment Inc.
Ito ay ang The Day I Loved You na pinangungunahan ng 24-year-old Singaporean actor na si Raynold Tan at ni Tommy Alejandrino, ang best actor winner sa 18th Cinemalaya Philippine Independent Festival noong 2022 para sa The Baseball Player.
"Next Asian Heartthrob" ang bansag kay Raynold na in-demand-high-end-brands endorser at napapanood sa mga programa ng Viu Singapore at Mediacorp Network, ang national media network sa Singapore.
May exclusive co-management deal ang Mediacorp Network sa Virtual Playground Global, ang talent management agency nina Dondon Monteverde at Charlie Dy.
Nang maghanap si Regal producer Roselle Monteverde ng aktor na magbibida sa The Day I Loved You, iminungkahi sa kanya ng Virtual Playground Global executives na kumuha ng international star.
Si Raynold ang napili nila.
Si Easy Ferrer ang direktor ng The Day I Loved You Me na tinatampukan din ng newcomer actor na si Rabin Angeles.
Raynold Tan (center) with The Day I Loved You co-stars Tommy Alejandrino (left) and Rabin Angeles (right)
Ang TCP Artistes Singapore ang namamahala sa showbiz at modelling career ni Raynold.
“Ang guwapo-guwapo niya,” pagsasalarawan ni Roselle sa Singaporean actor na natuklasan dahil sa TikTok.
Dumating sa Pilipinas si Raynold noong March 10, 2023 para sa shooting ng The Day I Loved You.
Umuwi siya sa Singapore noong March 23, pero babalik sa Pilipinas sa susunod na buwan para sa media conference ng BL series.
Puring-puri ng general manager ng Virtual Playground na si Mark Salamat ang kabutihan ng kalooban ni Raynold nang mamalagi ito sa Pilipinas.
Lahad niya sa Cabinet Files, “Napakapogi at napakabait na bata ni Raynold. Kayang-kaya niyang makipagsabayan sa mga sikat na Pinoy at Thai actors.
“Bumalik siya sa Singapore to finish his thesis for his graduation sa prestigious National University of Singapore, taking up Biology.
“He is expected to graduate in June and then after that he is open to take all possible opportunities sa showbiz sa Pilipinas and across Asia.”
Eksklusibong mapapanood ang The Day I Loved You sa official YouTube channel ng Regal simula sa April 26.