Opisyal na nagsimula ngayong Lunes ng umaga, May 15, 2023, ang pagiging Kapuso at Unang Hirit co-host ni Matteo Guidicelli.
Ipinakilala si Matteo sa pamamagitan ng paglabas niya mula sa isang malaking kahon na kulay dilaw at may nakasulat na “Open Me." Tulung-tulong itong binuksan ng Unang Hirit mainstays na sina Susan Enriquez, Ivan Mayrina, Mariz Umali, at Arnold Clavio.
Ayon kay Matteo, morning person siya kaya hindi mahirap para sa kanya ang gumising nang maaga at pumunta sa studio ng GMA-7 sa Quezon City.
Matunog na “Ma’am" at "Sir" ang tawag ni Matteo sa mga host ng Unang Hirit at hindi nawawala ang "po" at "opo" habang nakikipag-usap siya.
“I usually wake up [at] 5:30 a.m. pero paglabas ngayon 3:30 a.m.
“Usually when I wake up, coffee, tubig, tapos diretso sa exercise," sabi ni Matteo.
Read: Matteo Guidicelli, opisyal na ang pagiging Kapuso
Tuwang-tuwa si Matteo dahil sa mainit na pagtanggap sa kanya ng mga host ng early morning program ng Kapuso Network.
“I have to say you guys welcomed me very very nicely. I have to say thank you very much.
"Itong welcome, napakatindi at iba talaga. Maraming-maraming salamat.
"Hindi lang kayo pero everybody behind the camera. Maraming-maraming salamat po sa inyong lahat," aniya.
Nang sabihin ni Ivan na hindi lamang pan-kamera ang barkadahan ng mga host ng Unang Hirit, sumagot si Matteo ng “Kaya next time, Sir, imbitahan ko kayo sa concert ni Sarah.
“Sa lahat ng mga nanood sa concert ni Sarah, maraming-maraming salamat. Next show, nandoon na po kayo.”
Read: Sarah Geronimo reminisces about how Regine Velasquez helped her when she was a newbie
Bukod sa imbitasyon niya sa UH hosts sa susunod na concert ng misis niyang si Sarah, nag-imbita rin si Matteo sa kanilang farm sa Paete, Laguna, na may mga tanim na pinya at puwede silang mangabayo.
“Pagpunta natin doon, i-park natin ang kotse, may one kilometer na lakad,” ani Matteo.
Pauli-ulit na sinabi ni Matteo na nanonood si Sarah at proud ang kanyang asawa na bahagi na siya ng Unang Hirit.
“Sa sobrang excited ko kagabi, nanood pa kami ng Jessica Soho [Kapuso Mo Jessica Soho].
“Supportive siya. Actually nanonood siya ngayon.
"Hi love, good morning,” bati ni Matteo kay Sarah, na maraming beses niyang binati sa kanyang unang araw bilang co-host ng Unang Hirit.