Imbes na matuwa at magmalaki dahil gabi-gabi siyang napapanood sa mga primetime series ng GMA-7, TV5, at Kapamilya Channel, nahihiya si Epy Quizon dahil hindi niya inaasahang magpapang-abot ang pagpapalabas sa telebisyon ng kanyang mga proyekto.
Gumaganap siya bilang si Zuhl sa Voltes V: Legacy ng Kapuso Network, habang siya naman si Ador sa Dirty Linen na napapanood sa TV5 at Kapamilya Channel.
Umaani ng papuri si Epy dahil sa mahusay niyang pagganap sa dalawang roles na ipinagkatiwala sa kanya.
“Actually, to tell you the truth, medyo nahihiya ako sa parehong network kasi for some reason, nag-abot ang airing dates ng Voltes V ng GMA Network at ang Dirty Linen ng Kapamilya Network at TV5,” pahayag ni Epy nang makausap siya ng Cabinet Files.
“Siyempre, maski freelance ako, ayoko pa rin na mangyari yon, since I do not want anyone to feel that I am not loyal to the project and the network who believed in my craft.”
Ipinaliwanag ni Epy na nagpang-abot ang telecast ng kanyang mga tinatampukang programa dahil panahon pa ng pandemya nang umpisahan ang taping para sa Philippine adaptation ng Voltes V.
Ayon kay Epy, “First lock-in taping ko sa Voltes V was about two years ago. Ang Dirty Linen naman was around last September 2022 lang.
“Ngayon pa lang, humihingi na ako ng pasensiya sa bosses ng mga network at sana po ay maunawaan ninyo ako.”
Hindi nag-iisa si Epy sa sitwasyon nito.
Tulad niya, napapanood sina Christian Vazquez at Albert Martinez sa Voltes V: Legacy at sa The Iron Heart ng Kapamilya Channel at TV5. Hindi rin inakala ng dalawa na magpapang-abot ang telecast ng kanilang mga tinanggap na proyekto.