Noong May 16 pa ang kaarawan ni Patricia Javier pero isinabay niya ang selebrasyon sa send-off para sa kanyang anak na si Robert Douglas Walcher IV, ang kinatawan ng Pilipinas sa Mister Teen International 2023, ngayong Sabado ng tanghali, May 27, 2023.
Gaganapin ang grand coronation ng Mister Teen International 2023 sa Bangkok, Thailand, sa June 1.
Kasama ni Robert si Patricia at ang lola niya sa paglipad sa Thailand bukas, Linggo, May 28, para magbigay sa kanya ng suporta.
Read: Anak ni Patricia Javier, kinatawan ng Pilipinas sa Mister Teen International 2023
Hindi lamang ang tagumpay ni Robert sa international pageant na sasalihan nito ang birthday wish ni Patricia. Kasama rin sa mga panalangin niyang lumihis at humina ang malakas na Typhoon Betty na pumasok na sa Philippine Area of Responsibility ngayong Sabado ng umaga.
“Lumihis ang malakas ang bagyo at ang kaligtasan ng lahat ang mga birthday wish ko.
“I also believe that God will use my son to be a good role model for the youth and represent our country with pride!” sabi ni Patricia.
Nag-umpisa ang mga paghahanda ni Robert para sa Mister Teen International 2023 noong Abril 2023 matapos siyang piliin bilang opisyal na kinatawan ng ating bansa.
Si Patricia ang punong-abala sa pag-aasikaso ng kanyang 16-year-old son na sumailaim sa pagsasanay ng Kagandahang Flores Camp (KFC) ni Rodin Gilbert Flores.
“Robert was trained at KF Camp and then, sina Jace Diamond and Ma. Robina Zabala ng ACG Human Capital Solutions ang Question and Answer coaches niya.
“Sir Don Cristobal made all Robert’s outfits for the contest," pagbabahagi ni Patricia.
Ipinagmamalaki ni Patricia ang talent ng kanyang anak sa pag-arte, painting, at pagtugtog ng gitara at piano.
Advocate si Robert ng mental health awareness na isinusulong niya sa pamamagitan ng music video na mismong si Patricia ang direktor, sa tulong ng filmmaker na si Neal Buboy Tan.
“The video is about mental health awareness at ginamit namin ang mensahe ng Greek Philosopher na si Aristotle na ‘In your darkest moment we must focus to see the light.’
“Na God really loves us. Think of the people who cares for you and how hard it would be for them to move on when you’re gone. Sila ang habambuhay na masasaktan,” paliwanag ni Patricia tungkol sa music video na halaw mula sa isang tunay na pangyayari ang konsepto.