Hindi lamang si Raynold Tan ang bumisita sa Pilipinas at dumalo sa media conference para sa Cross-Border Talent Collaboration ng VP Global Management Philippines at ng TCP Artists Singapore na naganap noong Sabado, Hunyo 8, 2024.
Read: Singaporean actor Raynold Tan, nagkuwento tungkol sa kanyang Pinay yaya
Humarap din sa local entertainment press ang kanyang mga kapwa Singaporean actor na sina Brian Ng at David Matthew.
Maaaring pamilyar ang Kapuso viewers kina Brian at David dahil napanood sila sa cast ng Third Rail, ang Singaporean thriller-action series na napanood sa GMA-7 mula Abril 22, 2024 hanggang Mayo 24, 2024.
Gaya ni Raynold, umaasa sina Brian at David na mabibigyan sila ng pagkakataong magkaroon ng mga proyekto sa Pilipinas dahil sa pagsasanib-puwersa ng VP Global Management Philippines at ng TCP Artists Singapore, ang talent management na namamahala sa kanilang acting career.
Ipinahayag ni Brian sa idinaos na media conference na handa siyang iwanan ang Singapore at manirahan sa Pilipinas, kasama ang kanyang pamilya, kapag nakatanggap siya ng magandang proyekto.
Pilipina naman ang ina ni David kaya kumportableng-komportable ito sa tuwing umuuwi sa Pilipinas. Bukod sa mga pagkain, alam niya ang kultura ng mga Pilipino.
Mas nangingibabaw ang Indian features ni David. Kung hindi pa nito ipinagtapat na Pilipina ang nanay niya, hindi malalamang may dugong Pilipino siya.
VP GLOBAL MANAGEMENT-TCP ARTISTS COLLABORATION
Sina Rob Gomez, Sarah Edwards, Mika Reins, Christiana Zaleta, at Dylan Yturralde ang mga contract star ng VP Global Management Philippines.
Napagkakalooban sila ng oportunidad magkaroon ng mga proyekto sa Singapore sa tulong naman ng TCP Artists Singapore.
Si Charlie Dy ang CEO ng VP Global at si Sean Kevin ang CEO ng TCP Artists Singapore.
Pahayag ni Dy, “Our promise remains steadfast—to guide our talents towards the global stage and beyond. we are poised to explore new horizons, forge new partnerships, and elevate our talents to unprecedented heights globally.
“Together with TCP Artistes of Singapore, we will embark on the next chapter of excellence, unity, and triumph. With your continued support and our unwavering dedication, the future holds limitless possibilities.”
Pagmamalaki naman ni Kevin, "fastest growing artiste management" sa Singapore ang talent agency na kanyang pinamumunuan.
Aniya, “We are a company committed to excellence, pushing boundaries as well shaping our stars to their fullest potential.
“Together with VP Global, I am certain both the Philippines and Singapore markets can stand to enjoy the performance from 8 of our stars. I'll like to warmly welcome our 5 new stars from VP Global—Rob, Sarah, Mika, Dylan, and Christiana to the TCP Family.”