May malaking pagsubok na kinakaharap ang former PBB housemate at Vivamax star na si Franki Russell.
Nanganganib na hindi matuloy ang partisipasyon niya bilang kinatawan ng New Zealand sa Miss Universe 2024 na idaraos sa Mexico bago matapos ang taong kasalukuyan.
Inanunsiyo noong Marso 2024 ng nagmamay-ari ng Miss Universe franchise sa New Zealand ang pagkaka-appoint kay Franki bilang Miss Universe New Zealand.
Read: Franki Russell on being Miss New Zealand: "a ten year journey in the making"
Pero kung hindi maaayos ang isyung kinasasangkutan ni Franki, malaki ang posibilidad na bawiin ang korona at titulong ipinagkaloob sa kanya.
Maaaaring ibigay sa iba ang kanyang titulo bilang Miss Universe New Zeland dahil sa paglabas niya sa mga pelikula ng Vivamax.
Kabilang ang Pabuya, Tag-init, at Laruan sa mga sexy-drama project na pinagbidahan ni Franki sa Vivamax.
Ang paghuhubad niya sa mga nabanggit na pelikula ang itinuturong dahilan kaya namimiligro ang kanyang pagsali sa 73rd edition ng Miss Universe.
Read: Franki Russell, pa-tweetums sa pagpapa-sexy kumpara sa ibang Vivamax stars
INCLUSIVITY IN MISS UNIVERSE
Nakapagtatakang magiging problema sa paglahok ni Franki sa Miss Universe 2024 ang daring movies na ginawa niya para sa Vivamax.
Ipinagmamalaki ng Miss Universe Organization ang pagiging inclusive kaya tumatanggap na sila ng mga kandidatang transgender woman, may asawa at mga anak, single parents, matataba, at may mga edad na.
Hindi pa naglalabas ng opisyal na pahayag ang organizer ng Miss Universe New Zealand at maging si Franki tungkol sa kontrobersiyang kinasasangkutan niya.
Kung sakaling hindi matuloy ang paglahok ni Franki sa Miss Universe 2024, ito ang pangalawang pagkakataong nagkaroon ng malungkot na pangyayari sa kanyang Miss Universe bid.
Kabilang si Franki sa mga opisyal na kandidata sa kauna-unahang Miss Universe United Arab Emirates.
Pero nabalewala ang kanyang paglahok dahil kinansela ang gabi ng koronasyon ng nabanggit na patimpalak noong Nobyembre 7, 2021, kaya parang hindi nakaguhit sa palad niyang matupad ang pangarap makasali sa Miss Universe.
Read: Franki Russell at iba pang Miss Universe UAE candidates, dyosang-dyosa ang dating