Ang walang tigil na malakas na pagbuhos ng ulan at pagbaha sa Metro Manila at maraming lugar sa Luzon ang dahilan kaya kinansela ang live show ng Fast Talk with Boy Abunda ng GMA-7 at ng Wil To Win ng TV5 ngayong Miyerkules, Hulyo 24, 2024.
Ang magkapatid na Joshua at Jason Zamora ang mga bisita sa live show ng Fast Talk with Boy Abunda ngayong araw, pero nagkaroon ng problema sa pagluwas nila sa Metro Manila mula sa Pampanga dahil baha sa North Luzon Expressway.
Dahil sa hindi maiiwasang pangyayari, ang taped interview ni Boy kay Gloc-9 ang mapapanood ngayong hapon sa showbiz-oriented program ng Kapuso Network.
Read: Deadpool & Wolverine opening, sumabay sa pagragasa ng bagyong Carina
WIL TO WIN
Naglabas naman ngayong umaga ng mahalagang paalaala ang pamunuan ng Wil To Win na hindi live ang show ni Willie Revillame dahil sa perhuwisyong dala ng bagyong Carina.
Nakasaad dito: “Mga Kapatid, mahalaga sa amin ang kaligtasan ninyo at ng aming production staff kaya minarapat ng pamunuan ng “WIL TO WIN” na ipagpaliban muna ang LIVE show ngayong araw, July 24, dahil sa hindi magandang lagay ng panahon sa ating bansa.
“Para sa inyong kaligtasan, pinapayuhan ang lahat na ‘wag nang magtungo sa TV5 Novaliches dahil kanselado po ang lahat ng operasyon at studio audience booking ngayong Miyerkules.
"Mapapanood pa rin ang “WIL TO WIN” sa telebisyon mamayang 5PM sa TV5, BuKo, Sari Sari, at catch-up One PH.”
Read: Willie Revillame, nagreklamong nahihirapan na sa Wil To Win
OTHER CANCELLED SHOWBIZ EVENTS
Apektado rin ng masungit na panahon ang taping ng Sang’gre, ang upcoming drama fantasy series ng GMA-7, at ang game show ni Dingdong Dantes na Family Feud.
Pati na ang press conference ng My Dreams, ang concert ni Mark Bautista na itatanghal sa The Theatre ng Solaire Resort & Casino sa Agosto 31, 2024.
Kinansela ang press conference para sa concert ni Mark ngayong Miyerkules ng tanghali dahil sa kalagayan ng panahon.