Muling ipalalabas ng GMA-7 ang paglalaro ni Carlos Yulo sa Family Feud sa Lunes, Agosto 12, 2024.
Kasama ang mga Filipino gymnast na sina Miguel Besana, Breanna Labadan, at Charlie Manzano, naglaro si Carlos sa episode ng Family Feud na unang ipinalabas sa telebisyon noong Nobyembre 15, 2023.
Read: Carlos Yulo breaks silence on money issue with his mother
Ginamit ng grupo ni Carlos ang pangalan na Gymnastic Idols, at nakalaban nila ang Team Sepak Takraw Kickers.
Naimbitahan si Carlos sa Family Feud sa pamamagitan ni Jun Esturco, na lumipad din sa Paris para suportahan siya at ang ibang Filipino gymnasts sa Paris Olympics.
Si Carlos ang team captain ng Gymnastic Idols.
Mensahe ng Family Feud host na si Dingdong Dantes kay Carlos, “Isang karangalan na makasama ka. Good luck, ha? Nandito kaming lahat na magtsi-cheer sa yo.”
CARLOS YULO'S POPULARITY SOARS
Mula nang manalo si Carlos ng dalawang medalyang ginto sa 2024 Paris Olympics, nagkaroon ng interes ang mga Pilipino na panoorin sa YouTube ang kabanata ng Family Feud noong Nobyembre 2023.
Sa kasalukuyan, mahigit sa 560,000 na ang bilang ng mga nanood ng naturang episode.
Read: Carlos Yulo wins back-to-back gold medals for the Philippines
Ang popularidad ngayon ni Carlos, dahil sa tagumpay nito sa Paris Olympics, ang pangunahinng dahilan sa desisyon ng GMA-7 na muling ipalabas sa telebisyon ang guesting niya noong nakaraang taon.
Nakatakdang bumalik sa Pilipinas si Carlos sa Martes, Agosto 13, kaya akmang-akma ang replay ng Kapuso Network sa paglabas niya sa Family Feud.
Isang hero’s welcome ang naghihintay kay Carlos.
Bago pa man siya dumating sa bansa, makikita na sa paligid ng Metro Manila ang mga LED billboard at tarpaulins ng mga pagbati sa kanya dahil sa karangalang ibinigay niya sa Pilipinas.
Si Carlos at ang boxing’s bronze medalist na si Aira Villegas ang mga magsisilbing flag-bearer sa closing ceremony ng Paris Olympics na magaganap sa Stade de France nitong Linggo ng gabi, Agosto 11 (Lunes ng umaga, Agosto 12, sa Pilipinas).