Ilang araw nang nangungunang panoorin sa Netflix Philippines ang Lolo and The Kid, ang pelikulang pinagbibidahan ni Joel Torre at ng 11-year-old child actor na si Euwenn Mikael.
Read: Lolo And The Kid, No. 1 sa Movies; Pulang Araw, bumaba sa No. 2
Ayon sa ina ni Cristal Aleta, tuwang-tuwa ang kanyang anak sa mainit na pagtanggap ng publiko sa Lolo and The Kid.
Bukod kasi sa Pilipinas, tinatangkilik din sa ibang bansa ang nabanggit na pelikula.
“Kapag nag-uusap po kami ni Euwenn, natutuwa siya lalo na kapag may mga nakikita siyang social media post na Top 1 ang Lolo and The Kid sa ibang mga bansa.
“Super thankful po si Euwenn dahil siya ang napili para sa role ni Kid.
"Actually, hindi po siya nag-audition, pero may isang audition na si Euwenn ang nasa background, at siya ang napansin ni Direk Benedict Mique kaya ipinahanap po siya,” kuwento ni Cristal nang makausap siya ng Cabinet Files ngayong Martes, Agosto 13, 2024.
Si Cristal ang nakapanayam ng Cabinet Files dahil pumasok si Euwenn sa school.
Read: Euwenn Mikaell, unang nagbuking kina Miguel Tanfelix at Ysabel Ortega?
THE CONTROVERSIAL SCENE
Sa isang eksena ng Lolo and The Kid, ipinakita ang “bad-finger sign” ng karakter na ginampanan ni Euwenn.
Inihingi ito ng paumanhin ng kanyang ina dahil sa reaksiyon ng netizens.
Paliwanag ni Cristal, “Understandable naman po ang mga side comment. May mga nagtatanong lang po na bakit need pa mag-bad finger.
“So, nag-post po ako agad para hindi na po dumami ang mga tanong nila, especially mga miyembro kami ng Iglesia Ni Cristo.
"So, medyo awkward talaga yung bad-finger scene.”
Grade six elementary student si Euwennn.
Ayon sa ina ng child actor, napanood ng mga kaklase ni Euwenn ang Top 1 movie niya sa Netflix Philippines at masaya sila para sa kaklase nila.
Lahad ni Cristal, “Super proud po kay Euwenn ang buong Department of Education Region 3 at ang staff ng kanyang former school, ang Meycauayan West Central Integrated School.
“Siyempre po, proud din ang principal at classmates niya sa kanyang present school.
"Grade 6 na po si Euwenn at excited talaga siya sa pag-aaral dahil graduating na siya sa elementary this school year.”
Ang Lolo and The Kid at ang upcoming drama series ng GMA-7 na Forever Young ang dalawang proyektong magkasabay na ginawa ni Euwenn.
Ayon kay Cristal, inayos mabuti ang schedule ng kanyang anak kaya hindi nagkaroon ng problema sa pag-aaral ni Euwenn, sa shooting ng pelikula nila ni Joel, at sa taping ng programang pinagbibidahan niya.