Iuuwi sa Pilipinas ang mga labi ni Emman Atienza, ang TikTok influencer na pumanaw noong Oktubre 22, 2025, sa Los Angeles, California, USA.
Si Emman ang bunsong anak ng TV host na si Kim Atienza at ng businesswoman na si Felicia Hung.
Naririto sa Pilipinas si Kim, habang nasa U.S. na ang kanyang asawa.
Pero hindi pa tiyak kung kailan maiuuwi sa bansa ang bangkay ni Emman dahil sa maraming proseso na dapat sundin at gawin.
Si Kim ang isa sa mga hosts ng TiktoClock, ang morning variety show ng GMA-7.
Ikinalungkot ng kanyang mga kasamahan sa programa ang nakakagulat na pagkawala ni Emman.
Sa panayam ng Cabinet Files sa direktor na si Louie Ignacio ngayong Linggo, Oktubre 26, ipinahayag niya ang pakikiramay sa naulilang pamilya.
"Sabi ko kay Kuya Kim na nandito lang kaming mga kaibigan mo.
"At taos-pusong pakikiramay. No words, at alam kong sobrang sakit ng nararamdaman niya at pagkabigla sa nangyari kay Emman.
“Lagi niyang ikinukuwento sa akin si Emman na sobrang mahal niya,” ang sabi ni Louie.
THE SHOW MUST GO ON FOR KIM ATIENZA
Nakarating kay Kim ang balita tungkol sa nakabibiglang pangyayari sa kanyang anak noong Huwebes, Oktubre 23.
Sa kabila ng matinding kalungkutan na nararamdaman, tinapos ni Kim ang mga trabaho bilang host ng TiktoClock noong araw na iyon.
Napansin daw ng kanyang mga kasamahan ang kakaibang kalungkutan at katahimikan ng usually-bubbly TV host.
Pero hindi nila alam ang nangyari at hindi sila nagkaroon ng hinala sa bigat ng pinagdaraanan niya.
Ipinakita ni Kim ang tunay na kahulugan ng propesyunalismo dahil kahit nagluluksa at nagdurugo ang kanyang puso, hindi ito nahalata sa live broadcast ng TiktoClock noong Huwebes at sa taping ng tatlong kabanata ng programa.
Itinanong ng Cabinet Files kay Louie ang mga plano ng TV host habang hindi pa naiuuwi sa Pilipinas ang bangkay ni Emman.
"Hindi pa ako sure kung ano ang balak ni Kuya Kim sa mga darating na araw at wala pa naman siyang sinasabi sa show kung magbabakasyon muna siya,” ang sagot ni Louie.
Read: Ellen Adarna laughs off rumor linking Sarah Lahbati to marital woes