Hindi kumpleto ang mga miyembro ng Filipino boyband na BGYO nang bumisita sila sa Fast Talk With Boy Abunda nitong Lunes ng hapon, Hulyo 6, 2026.
Masama raw ang pakiramdam ni Mikki Claver kaya sina Gelo Rivera, Akira Morishita, John Lloyd "JL" Toreliza, at Nate Porcalla lamang ang mga nakausap ni Boy Abunda.
GELO ON BEING LINKED TO ALEXA AND BIANCA
Sa naturang panayam, sinabi ni Gelo na wala siyang girlfriend dahil magkaibigan lamang daw sila ng mga aktres na nauugnay sa kanya — sina Alexa Ilacad at Bianca de Vera.
Sabi ni Gelo tungkol kay Alexa, “Siguro ngayon, masasabi ko getting to know [each other]. Bina-value namin kung anong meron kaming partnership, friendship.
"Pero whatever happens, we just let it flow naturally."
Paliwanag pa ni Gelo tungkol sa friendship nila ni Alexa: "Meron din po kaming series din po na kasama ko rin po si Alexa.
"We’re friends po. Getting to know din po.
“Nakasama ko rin po siya before pa bago yung acting series namin. Very close naman po.”
Ang tinutukoy ni Gelo na series nila ni Alexa ay ang vertical microdrama na The Chambermaid's Daughter.
Tungkol naman kay Bianca, ani Gelo: “I think nagsimula yan kasi noong may video kami na naglalakad together, pero we go out in groups,
“Magkaibigan po kami. I think, masasabi ko, like yung koneksiyon namin was genuine naman and we’re really good friends po.”
Read: Celia Rodriguez revisits '80s sex symbol Stella Strada tragedy
JL ON GAY RUMOR
Sinagot naman ni JL ang mga gay rumor tungkol sa kanya.
Hindi rin niya pinabulaanang may mga kaibigan siyang miyembro ng LGBTQIA+ community.
“Sa akin, madami ang nagsasabi na mukha raw akong gay,” pag-amin ni JL.
“Marami po akong friends na gay. Like, volleyball player po ako so ang dami kong kasamang gays.”
May mga na-in love at nanliligaw bang gays sa kanya?
Sagot ni JL: “Marami po, like sinasabi nila na crush nila ako, so nakakatuwa siya kasi naa-appreciate ako.
"Yun po ang nakakatuwa, kapag nag-compliment sila.”
Sinagot din ni JL ang isyung may mga tagahanga ang BINI na ayaw sa BGYO.
Aniya: “Kanya-kanya naman po yan ng opinyon, like hindi naman po namin mapi-please lahat na gusto nila kaming mapagsama.
"Pero kami po talaga ng BINI, talagang sinusuportahan po namin ang bawat isa and talagang magkakaibigan kami. Magkakasama po kaming mag-training."
Ang BGYO at BINI ay parehong nasa pangangalaga ng Star Magic, ang talent management arm ng ABS-CBN.
BGYO ON CYBERLIBEL CASE
Noong 2024, naghain ng reklamong cyberlibel ang BGYO laban sa bashers na nagpapakalat ng fake news at sa mga bumabatikos sa kanila sa social media.
Pero ayon kay Gelo, “Actually, hindi po siya puwedeng pag-usapan, pero it’s a long process na we’re handling it carefully po.”
Inihain ng BGYO members ang kanilang complaint sa Quezon City Prosecutor’s Office noong Hunyo 19, 2024.