Tumangging magbigay ng komento ang aktor na si Eric Ejercito tungkol sa kanyang amang si dating Pagsanjan, Laguna Mayor ER Ejercito.
Naninindigan si ER na siya pa rin ang alkalde ng Pagsanjan, kahit ang vice-mayor niyang si Januario Ferry Garcia na ang nakaupong mayor mula pa noong Disyembre 2025.
“No comment muna dun. I don’t know what to respond. I have to go inside [the cinema]," magalang na sagot ni Eric.
Nakausap ng entertainment press si Eric sa red-carpet premiere ng international movie na The Guardian na ginanap sa Cinema 1 ng Robinson’s Galleria, sa Quezon City, nitong Lunes ng gabi, Agosto 31, 2026.
Iginalang ng entertainment press ang desisyon ni Eric na huwag magsalita tungkol sa kontrobersiyal na usapin kaya hindi na nila tinanong ang aktor tungkol sa kasalukuyang kinaroroonan ng kanyang ama.
Matagal nang hindi nagpapakita sa publiko si ER buhat nang palitan siya ni Garcia bilang alkalde ng Pagsanjan.
Read: ER Ejercito, itinangging pinalitan siya bilang Pagsanjan mayor
THE GUARDIAN
Ang The Guardian ang unang international project ni Eric.
Maligayang-maligaya si Eric sa karakter na ginampanan niya sa South Korean movie na pinagbibidahan ng singer, dancer, at aktor na si Nam Woo Hyun, na miyembro ng popular boy band na INFINITE.
Kasama rin sa The Guardian sina Wilbert Ross, Yassi Pressman, at ang Korean actress na si Park Eun Hye, na dumating sa Pilipinas para sa red-carpet premiere ng pelikula.
Markado ang karakter ni Eric bilang kasamahan sa trabaho at kaibigan ng papel na binigyang-buhay ni Nam Woo Hyun.
Ipinamalas ni Eric sa The Guardian ang talento niya sa pag-arte at sa pagbibitaw ng linya sa wikang Ingles.
“Yes, this is my first international film. Actually, my first movie in a long time. I am so blessed and thankful.
“My last movie, I don’t even remember anymore. It’s been that long.
"But the first movie ever I did was Asiong Salonga [2011],” pahayag ni Eric sa Cabinet Files.
Tagahanga raw ng mga K-drama si Eric kaya hindi siya makapaniwalang darating ang araw na mapapanood siya sa isang South Korean movie.
Saad niya: “I am a fan of K-drama. As an actor, I wanna reach international heights like Hollywood and K-drama.
"Hindi ko naman akalain na ito ang bingo card ko, two years ago.
"And I am so overwhelmed kasi it’s a worldwide film. It’s already released by Lionsgate, I heard, so worldwide na siya.
“As an actor, gusto mong marating, you wanna be seen all over the world, and it happened so I am just grateful.”
Read: The Guardian producer reveals LGU challenges while shooting film