Standing ovation mula sa manonood ang tinanggap ni Atasha Muhlach at ng cast ng Bongga Ka ‘Day: The Annie Batungbakal Musical sa unang gabi ng pagtatanghal nila noong Biyernes, Setyembre 18, 2026, sa Newport Performing Arts Theater ng Resorts World Manila, Pasay City.
Pinahanga ni Atasha at ng mga kasamahan nito sa Bongga Ka ‘Day ang mga tumangkilik sa kanilang palabas, kaya hindi niya napigilang mapaluha dahil sa naramdamang kaligayahan at taos-pusong pasasalamat.
Nabigyan ni Atasha ng hustisya ang pagganap sa karakter ni Annie Batungbakal na unang binigyang-buhay ni National Artist for Film and Broadcast Arts Nora Aunor sa Annie Batungbakal, ang pelikula na ipinalabas sa mga sinehan noong Setyembre 14, 1979.
Read: Atasha Muhlach admits to being hurt by criticisms
ATASHA MUHLACH PERFORMED DESPITE HER SPRAIN
Dalawang araw bago naganap ang unang pagtatanghal ng Bongga Ka ‘Day, nagkaroon ng sprain ang paa ni Atasha sa technical dress rehearsal noong Miyerkules, Setyembre 16 dahil nasobrahan siya sa paggalaw.
Sa tulong ng isang physical therapist, bumuti ang kalagayan ni Atasha at walang nakahalata na may pinagdaraanan siya dahil normal na normal ang kanyang mga kilos sa opening night ng pinag-uusapan na musical na pinagbibidahan niya.
"Inilaban po ni Atasha,” ang reaksyon ng isang saksi na nakausap ng Cabinet Files at bilib na bilib sa propesyonalismo na ipinamalas ni Atasha.
Sinuportahan ng mga magulang ni Atasha na sina Aga Muhlach at Charlene Gonzales ang unang gabi ng kanyang pagtatanghal bilang Annie Batungbakal.
May mga naghanap sa kakambal ni Atasha na si Andres pero wala ito dahil nasa ibang bansa siya.
Ang mahusay na pagganap ni Atasha sa karakter ni Anne Batungbakal ang patunay na hindi siya naapektuhan ng mga batikos na natanggap niya nang i-anunsyo noong Hulyo 2026 ang kanyang pagbibida sa Bongga Ka ‘Day.
Imbes na panghinaan ng loob, lalong ginalingan ni Atasha ang pagganap sa katauhan ni Annie Batungbakal kaya nakakatanggap siya ngayon ng mga papuri mula sa mga nanood ng Bongga Ka ‘Day.
Read: Aga Muhlach, Charlene Gonzalez react to criticisms against Atasha