Si Senator Manny Pacquiao ang unang presidential aspirant na naghain ng kanyang certificate of candidacy sa Commission on Elections sa Sofitel Philippine Plaza Manila, Pasay City, ngayong umaga, October 1.
Kasama ni Pacquiao sa paghahain ng kandidatura nito sa pagkapangulo sa 2022 elections ang kanyang asawa na si Jinkee Pacquiao at ang running-mate niyang si Buhay Party-list Representative Lito Atienza.
Marami ang nasorpresa sa Pacquiao-Atienza tandem dahil walang pahiwatig na tatakbo bilang bise-presidente ng bansa ang dating alkalde ng Maynila at environment secretary sa administrasyon ni former Philippine President Gloria Macapagal-Arroyo.
Malaki ang naitulong ni Atienza kay Pacquiao noong struggling boxer pa lamang ito kaya pangalawang ama ang turing sa kanya ng Pambansang Kamao.
Si Atienza ang isa sa mga pinasalamatan ni Pacquiao nang mag-anunsiyo ito ng pagreretiro sa boxing dahil naging bahagi ng kanyang tagumpay ang pinili niyang bise presidente sa eleksyon sa 2022.
Magkasama at magkasabay na naghain ng kandidatura sina Pacquiao at Atienza.
Trending ngayon sa social media ang pangalan ni Atienza dahil marami ang nagulat sa desisyon niyang maging running mate ng Filipino boxing hero na nangangarap maging Pangulo ng Pilipinas.
Nangyari ang paghahain ni Atienza ng certificate of candidacy sa huling araw sa TV Patrol ng kanyang anak na si Kim Atienza, na ilang araw nang laman ng mga balita.
Tulad ng pagkandidato ni Atienza bilang pangalawang pangulo, ikinagulat ng publiko ang pasya ni Kim na magpaalam sa Kapamilya Network para lumipat sa GMA-7.