Kahit matagal nang panahon ang nakalipas, marami pa rin ang nagulat sa rebelasyon ni Pops Fernandez na nakarelasyon niya noon sina Aga Muhlach at Piolo Pascual sa "Jojowain o Totropahin Challenge" na mapapanood sa kanyang YouTube channel.
Pinag-usapan ang walang kamali-malisyang pag-amin ni Pops na lantarang kinainggitan ng mga kapwa niya babae dahil mga guwapo at sikat ang kanyang mga ex-boyfriend.
“Pops is Pops” at “Unli-Pops” ang ilan sa mga reaksiyon ng netizens tungkol sa pangungumpisal na ginawa ni Pops.
Magdiriwang ng kanyang 55th birthday si Pops sa December 12 pero parang bampira siya dahil hindi tumatanda ang hitsura niya.
In fact, habang nagkakaedad, lalong gumaganda si Pops dahil marunong mag-alaga sa sarili kaya walang panahong nakita siyang tumataba o lumalapad ang pangangatawan.
Ang reaksiyon ng isang malapit na kaibigan ni Pops tungkol sa ipinagtapat nitong “na-jowa” niya si Piolo ang hinihintay ng mga nakakaalam sa mga tunay na pangyayari.
Bago pa umamin si Pops na may nakaraan sila ni Piolo, ang kanyang close friend ang unang nakarelasyon ng 44-year-old actor kaya may karapatan ang "mystery friend" na magsalita ng “Una siyang naging akin.”
Ang tanong: lalantad ba ang kaibigan ni Pops para isiwalat sa buong mundo na may nakalipas din sila ni Piolo o pipiliin na lang niyang manahimik para hindi na humaba pa ang kuwento?