Hindi ipinagbabawal ang COVID-19 vaccine sa mga taong may comorbidities, o may iniindang sakit.
Sa katunayan, mahalaga silang mabakunahan dahil kabilang sila sa high-risk group na delikadong dapuan ng virus.
“They are not contraindicated to receive the vaccine,” sabi ni Dr. Beverly Lorraine Ho, Director IV ng Health Promotion and Communication Service ng Department of Health (DOH).
Gayunman, binigyang-diin ni Ho na mahalagang dumaan sa masusing assessment ng doktor ang sinumang mayroong comorbidities na magpapabakuna kontra COVID-19 vaccine.
Aniya, bagamat sasailalim sa health screening ng mga doktor ang lahat ng magpapabakuna, mayroong mga uri ng comorbidities na kailangan munang may clearance mula sa mga espesyalista.
COMORBIDITIES & COVID-19 VACCINE
Sa pagharap ni Ho sa editors at writers ng 14 Summit Media websites—kabilang ang PEP.ph (Philippine Entertainment Portal)—ngayong Huwebes, March 18, binanggit niya ang dalawang uri ng comorbidities sa pasyente.
Ito ay ang regular comorbidities at serious comorbidities.
Paliwanag ni Ho: “Some people have more serious comorbidities that requires them to have regular specialist consultation.
“Kunwari HIV [human immunodeficiency virus] patient sila, or cancer patient sila, sa protocol natin, it’s not enough that you get screened on the day itself.
“The recommendation is for them to get actual clearance from their specialists.”
Ang mga espesyalista raw kasi ang makapagsasabi kung nasa maayos na medical condition ang kanilang pasyenteng may serious comorbidities para tumanggap ng COVID-19 vaccine.
“Nakita na sila nung mga doktor na tumitingin sa kanila for a long period of time, so, alam nila yung nuances nung sakit nila.
“But if it’s considered as regular comorbidities, like hypertension, diabetes, asthma, then it’s really the screening on site that will just be needed for them to get the vaccine,” paliwanag pa ni Ho.
ADVERSE REACTIONS AFTER INOCULATION
Normal lang makaranas ng adverse reactions ang mga vaccine recipient, na imo-monitor muna sa vaccination site sa loob ng 30 minuto hanggang isang oras matapos maturukan.
Sa panig ng DOH, handa itong agarang tugunan ang anumang side effects na mararamdaman ng recipient, ayon kay Ho.
“It’s important to note that most of the adverse events that will be caused by the vaccine will actually happen within the first hour of getting vaccinated.
“Kaya ngayon, the set-up din talaga natin is the vaccination sites are mostly in tertiary facilities or kung maramihan na yung babakunahan natin, magmu-move na tayo sa—for example—school buildings or gyms, pero may nakaabang na ambulance.”
Tiniyak naman ni Ho na sasagutin ng gobyerno ang pagpapagamot sa anumang adverse reactions na idinulot ng COVID-19 vaccine.
“If the adverse event is caused by the vaccine itself, so yes, that would be covered by the government. Yung care na yun, automatically, covered siya ng government kasi dahilan yun ng pagbabakuna,” sabi ni Ho.
BENEFITS OF THE JAB
Ayon kay Ho, mahalagang mabakunahan ang lahat bilang proteksiyon sa panganib na dulot ng COVID-19.
“The vaccine can protect us from one, mild and asymptomatic COVID; second, moderate to severe COVID; and third, from transmission.”
Sinabi ni Ho na bagamat “hindi pa clear” sa ngayon kung lubos ngang napipigilan ng bakuna ang hawahan ng virus, ang lahat daw ng COVID-19 vaccine brands sa merkado ay “almost perfect” na nagbibigay ng proteksiyon, lalo na laban sa moderate to severe COVID-19.
“Most of them are in the 90-100 percent [efficacy],” pagtitiyak ni Ho.
VACCINATED HEALTHCARE WORKER DIES OF COVID-19
Ipinaliwanag ni Ho na hindi ipinagbabawal sa mga mayroong comorbidities ang COVID-19 vaccine kasunod ng pagkasawi ng isang healthcare personnel na nagpositibo sa virus ilang araw makaraang mabakunahan.
Kinumpirma kasi ni Dr. Rommel Lobo, vice chairman ng National Adverse Events Following Immunization Committee (NAEFIC), na mayroong comorbidities ang 47-year-old female healthcare worker.
Sa virtual presser ngayong Huwebes, ipinaliwanag ni Lobo na ang hypertension, diabetes, at bronchial asthma na iniinda ng healthcare worker “put her at risk for developing COVID-19.”
Bukod dito, dati na rin daw nagka-COVID-19 ang healthcare worker noong nakaraang taon.
Sa kabila ng mga nabanggit na konsiderasyon, iginiit ni Lobo na hindi ang COVID-19 vaccine ang dahilan ng pagkasawi ng healthcare worker.
Ayon kay Lobo, March 4 nang turukan ang healthcare worker ng Sinovac vaccine.
Wala raw sintomas ng COVID-19 ang recipient ng araw na iyon.
Noong March 8, nagpositibo sa virus ang healthcare worker pero sa una ay tumanggi raw itong magpaospital.
Na-admit ito sa pagamutan noong March 10, pero namatay din sa COVID-19 makalipas ang tatlong araw, o nitong March 13.
“NONE OF THE VACCINE CAN MAKE PEOPLE SICK”
Paliwanag ni Lobo, “The patient might have been exposed to a [COVID-19-positive] individual that she had encountered and then she might be incubating or… asymptomatic at the time that she was vaccinated.
“The COVID-19 vaccine does not cause, as we all know, COVID-19 disease because it’s an inactivated vaccine,” diin pa ni Lobo.
Ang ibig sabihin ni Lobo sa "inactivated" ay wala pang bisa o hindi pa nagbibigay ng proteksiyon laban sa virus ang unang dose ng bakuna.
“None of the vaccines used in the Philippines can make people sick with COVID-19.”
Samantala, patuloy sa pagdami ang mga naitatalang new infections sa bansa.
Ngayong Huwebes, nakapagtala ang DOH ng 5,290 bagong nagpositibo sa COVID-19.
Dahil dito, nasa 640,984 na ang kabuuang bilang ng confirmed cases sa bansa.
Nasa 66,567 ang ginagamot sa COVID-19 sa kasalukuyan, habang 12,887 na ang pumanaw.
